سدی پیٹ۔28 جنوری (سیاست ڈسٹرکٹ نیوز) جمعیتہ العلماء ضلع سدی پیٹ کے صدر مفتی عبدالسلام قاسمی نے ایک وفد کے ہمراہ سی پی آفس پہنچ کر ڈی سی پی ایڈمن کشالکر سے ملاقات کی اور اسپیشل برانچ (SB) پولیس کی جانب سے مساجد اور مدارس سے ایک مخصوص پروفارما کے تحت معلومات کے اندراج پر پیدا ہونے والی تشویش سے انہیں آگاہ کیا۔مفتی عبدالسلام قاسمی نے بتایا کہ جنرل سیکریٹری جمعیتہ العلماء تلنگانہ حافظ پیر خلیق صابر کی ہدایت پر یہ ملاقات کی گئی، جس میں وفد نے اس بات کی شکایت درج کروائی کہ اسپیشل برانچ پولیس مختلف منڈلوں میں مساجد اور مدارس کے ذمہ داران سے سوالنامے کے ذریعے معلومات حاصل کر رہی ہے، جس کے باعث بالخصوص دیہی علاقوں میں خوف اور بے چینی کی فضا پیدا ہو گئی ہے۔اس موقع پر ڈی سی پی ایڈمن مسٹر کشالکر نے شکایت کا سنجیدگی سے نوٹس لیتے ہوئے اسپیشل برانچ کے متعلقہ سی آئی سے بات چیت کی۔ ڈی سی پی اور اسپیشل برانچ کے سی آئی نے یقین دلایا کہ یہ عمل صرف مساجد یا مدارس تک محدود نہیں بلکہ تمام مذہبی مقامات، بشمول مندر اور چرچ، کے لیے یکساں طور پر انجام دیا جا رہا ہے۔ لہٰذا مساجد اور مدارس کے ذمہ داران کو کسی بھی قسم کے خوف یا گھبراہٹ میں مبتلا ہونے کی ضرورت نہیں ہے۔مزید رہنمائی اور معلومات کیلئے ان نمبروں 9052209731 یا 9676444844پر ربط کریں ۔
