اتحاد کی کارگل ہل ڈیولپمنٹ کونسل انتخابات میں تاریخی جیت : عمر عبداللہ
سرینگر: جموں وکشمیر نیشنل کانفرنس کے نائب صدر عمر عبداللہ نے کہاکہ کارگل انتخابات میں نیشنل کانفرنس ۔کانگریس اتحاد نے بی جے پی کو بری طرح سے پچھاڑ کے رکھ دیا ہے۔انہوں نے مزید بتایا کہ الیکشن کے نتائج ان تمام جماعتوں اور قوتوں کے لئے سبق آموز ہے جنہوں نے غیر جمہوری اور غیر آئینی طریقے سے جموں وکشمیر اور لداخ کے عوام کی مرضی کے بغیر ریاست کو تقسیم کیا۔عمر عبداللہ نے اپنے ایک بیان میں کہاکہ نیشنل کانفرنس اور کانگریس اتحاد نے کارگل ہل ڈیلوپمنٹ کونسل انتخابات میں تاریخی جیت رقم کی ہے۔انہوں نے کہاکہ کانگریس اور نیشنل کانفرنس کے مضبوط اتحاد نے بھارتیہ جنتاپارٹی کو شکست سے دو چار کیا۔انہوں نے مزید بتایا کہ یہ جیت زنسکار، کارگل اور دراس کے لوگوں کی ہے جنہوں نے فیصلہ کن طورپر نیشنل کانفرنس اور کانگریس اتحاد کی تائید کی ، ہم تمام منتخب کونسلروں کو دل کی گہرائیوں سے مبارکباد پیش کرتے ہیں جو عوام کی خدمت کے لئے ہمیشہ پیش پیش رہے ہیں۔عمر عبداللہ نے کہاکہ ہم کانگریس پارٹی کی قیادت کا ان کی غیر متزلزل حمایت کے لئے بے حد مشکور ہیں۔این سی نائب صدر نے کہاکہ یہ بی جے پی لیڈروں کے لئے چشم کشاں ہے۔انہوں نے کہاکہ جموں وکشمیر میں بھی جمہوری طورپر منتخب حکومت کی عوام کی جائز خواہش کو تسلیم کیا جانا چاہئے کیونکہ جمہوریت کا تقاضہ ہے کہ عوام کی آواز سنی جائے اور ان کا احترام کیا جائے۔ہم اس موقع پر اپنے مخلص پارٹی کارکنان کو بھی خراج تحسین پیش کرتے ہیں جنہوں نے دن رات محنت کی اور مشکل حالات میں ثابت قدم رہے۔ان کا مزید کہنا تھا کہ کرگل انتخابات میں لوگوں نے بھارتیہ جنتاپارٹی کو مسترد کیا جس سے یہ عیاں ہوتا ہے کہ یہاں کے لوگ کیاچاہتے ہیں۔ تفصیلات کے مطابق یل اے ایچ ڈی سی – کارگل انتخابی نتائج میںلداخ خود مختار پہاڑی ترقیاتی کونسل – کارگل کے انتخابات میں نیشنل کانفرنس اور کانگریس نے مل کر 22 سیٹیں جیتیں ہیں۔حکام نے آج بتایا کہ لداخ خود مختار پہاڑی ترقیاتی کونسل (LAHDC) – کارگل کا انتخاب آئین کے آرٹیکل 370 کی منسوخی کے بعد لداخ کو یونین ٹیریٹری کے طور پر تشکیل دینے کے بعد منعقد ہونے والا پہلا الیکشن تھا۔کونسل کی 26 نشستوں پر 4 اکتوبر کو پولنگ ہوئی تھی۔انتظامیہ 30 رکنی کونسل کے لیے ووٹنگ کے حقوق کے ساتھ چار اراکین کو نامزد کرتی ہے۔ حکام کے مطابق، نیشنل کانفرنس (این سی) نے 12 نشستیں حاصل کیں، جس سے وہ واحد سب سے بڑی پارٹی بن گئی، جب کہ اس کی اتحادی کانگریس نے 10 نشستوں پر کامیابی حاصل کی۔ اس طرحنیشنل کانفرنس-کانگریس کے اتحاد نے 26 رکنی لداخ خود مختار پہاڑی ترقیاتی کونسل-کارگل کے انتخابات میں شاندار کامیابی حاصل کی اور 22 نشستیں حاصل کیں، جب سے لداخ کو 2019 میں یونین ٹیریٹری (UT) کے طور پر تشکیل دیا گیا تھا، اس کے بعد ہونے والے پہلے انتخابات میں بھارتیہ جنتا پارٹی (بی جے پی) صرف دو سیٹیں جیتنے میں کامیاب رہی ہے۔