سرینگر: کشمیر زون پولیس کے انسپکٹر جنرل وجے کار کا کہنا ہیکہ وادی کشمیر میں جنگجو مساجد کا غلط استعمال کر رہے ہیں۔انہوں نے کہا کہ لوگوں کو جنگجوؤں کی طرف سے ایسا کرنے کی مذمت کرنی چاہئے ۔انسپکٹر جنرل نے ان باتوں کا اظہار پیر کو اپنے آفیشل ٹویٹر ہینڈل پر ایک ٹویٹ میں کیا ہے ۔ٹویٹ میں ان کا کہنا تھاکہ جنگجوؤں نے حملے کرنے کی خاطر مساجد کا غلط استعمال کیا ہے ، پانپور میں 19 جون 2020، سوپور میں یکم جولائی 2020 اور شوپیاں میں 9 اپریل 2021کو ایسا کیا گیا۔ عام لوگوں، مساجد انتظامیہ، سول سوسائٹی اور میڈیا کو چاہئے کہ وہ اس کی مذمت کریں۔ جنوبی کشمیر کے ضلع شوپیاں کے جان محلے میں 9اپریل کو ایک مسجد میں پناہ گزین جنگجوؤں اور سیکورٹی فورسز کے درمیان تصادم ہوا تھا جس میں 5جنگجو مارے گئے تھے اور مسجد کو بھی نقصان پہنچا تھا۔موصوف انسپکٹر جنرل نے اس دن ایک پریس کانفرنس سے خطاب کے دوران کہا تھا کہ آپریشن کے دوران مسجد کا احترام کرتے ہوئے کسی آئی ای ڈی، راکٹ لانچر یا دھماکہ خیز مواد کا استعمال نہیں کیا گیا اور مسجد میں آگ لگنی بھی نہیں دی گئی۔
