نئی دہلی : وزیر خارجہ ایس جئے شنکر نے لوک سبھا میں ایسے لوگوں سے متعلق اطلاع دی جو کہ ہندوستان سے بیرون ممالک چلے گئے ہیں اور ہندوستانی شہریت چھوڑ دی ہے۔ جئے شنکر نے لوک سبھا میں بتایا کہ اب تک 87 ہزار سے زائد ہندوستانیوں نے اپنی شہریت ترک کر دی ہے۔ ایک سوال کا تحریری جواب دیتے ہوئے انھوں نے یہ بات بتائی اور کہا کہ یہ تعداد جون 2023 تک کی ہے۔ایس جئے شنکر کا کہنا ہے کہ تازہ اعداد و شمار سامنے آنے کے بعد 2011 کے بعد سے ہندوستانی شہریت چھوڑنے والوں کی تعداد 17.50 لاکھ سے زائد ہوگئی ہے۔ شہریت چھوڑنے والے لوگ اب اس ملک کے شہری بن گئے ہیں جہاں جا کر وہ بسے ہیں۔ جئے شنکر نے لوک سبھا میں لوگوں کے ہندوستانی شہریت چھوڑنے کی وجہ بھی بتائی ہے۔ انھوں نے کہا کہ کئی اشخاص نے ذاتی سہولت کی وجہ سے غیر ملکی شہریت کا متبادل منتخب کیا ہے۔ یہاں غور کرنے والی بات یہ ہے کہ ہندوستان دوہری شہریت کی پیشکش نہیں کرتا ہے۔ اس وجہ سے جب ہندوستانی شہری بیرون ممالک جاتے ہیں تو جس ملک میں وہ گئے ہیں، اس کے لیے پی آر محفوظ کرنے کے لیے انھیں کبھی کبھی اپنی ہندوستانی شہریت چھوڑنے کی ضرورت ہوتی ہے۔
