نئی دہلی : کانگریس کے سابق صدر راہول گاندھی نے آج قومی یومِ صحافت پر مرکز کی مودی حکومت کو خوب تنقید کا نشانہ بنایا۔ انھوں نے کہا کہ جب سچ بولنے کی سزا ہوتی ہے تو یہ صاف ہے کہ ’جھوٹ‘ برسراقتدار ہے۔ قابل ذکر ہے کہ پریس کونسل آف انڈیا کے قیام کے موقع پر ہر سال 16 نومبر کو قومی یومِ صحافت منایا جاتا ہے۔ اس موقع پر راہول گاندھی نے ایک ٹوئٹ میں لکھا کہ ’’جب سچ بولنے کی سزا ہوتی ہے، تو یہ صاف ہے کہ جھوٹ اقتدار میں ہے۔‘‘ راہول گاندھی نے ایک ویڈیو بھی شیئر کیا جس میں تریپورہ سمیت کئی مقامات پر صحافیوں کی گرفتاری اور ان پر حملوں کے ساتھ ساتھ اس سے جڑیں خبروں کا تذکرہ کیا گیا ہے۔واضح رہے کہ تریپورہ میں تشدد کے حالیہ واقعات پر رپورٹ شائع کرنے والی دو صحافیوں کو پولیس نے حراست میں لیا تھا۔ اس کے علاوہ تشدد کی خبروں کو پوسٹ کرنے والے کئی صحافیوں اور عام لوگوں کے خلاف بھی یو اے پی اے کے تحت کیس درج کیا گیا ہے۔ اس پر راہول گاندھی نے اتوار کو بی جے پی حکومت پر الزام عائد کیا تھا کہ یہ صحافت کا ’قتل‘ کرنے میں مصروف ہے۔بہر حال، آج صبح راہول گاندھی نے مرکز کے متنازعہ زرعی قوانین کے خلاف دہلی کی سرحدوں پر تقریباً ایک سال سے چل رہی کسان تحریک کی حمایت میں بھی ٹوئٹ کیا۔ انھوں نے اس میں لکھا کہ ’’جب کسان نام کے آگے ’شہید‘ لگانا پڑے، سمجھ جاؤ کہ حکومت کا ظلم حد سے بڑھ گیا ہے۔ اَن داتا کے ستیہ گرہ کو سلام!‘‘
