ریاض ( کے این واصف) حرمین ٹرین حجاج کرام کیلئے ایک نعمت ہے ، آرام دہ سہولت بخش اور تیز رفتار اور ارزاں بھی ۔ سعودی ریلوے کمپنی ( سار) نے کہا ہے کہ حج سیزن 2023 میں حرمین ایکسپریس کا آپریشنل پلان کامیاب رہا ہے ۔اس سال حج سیزن میں ساڑھے سات لاکھ سے زیادہ افراد نے سفر کیا ۔ 2022 کے مقابلے میں سفر کرنے والوں کی تعداد 96 فیصد سے زیادہ رہی ۔ سرکاری خبر رساں ایجنسی ایس پی اے کے مطابق ریلوے کمپنی سار نے بیان میں کہا کہ حرمین ایکسپریس ٹرین نے 36 ہزار سے زیادہ راؤنڈ لگائے جو 2022 کے مقابلے میں 79فیصد زیادہ تھے ۔ علاوہ ازیں 227 اضافی ٹرینیں چلائی گئی ہیں ۔ بیان میں کہا گیا کہ مشاعر مقدسہ ٹرین نے 98فیصد تک نظام الاوقات کی پابندی کی ۔ مکہ مکرمہ اور مدینہ منورہ کے درمیان ٹرینیں جدہ کے سلیمانیہ اسٹیشن ، کنگ عبدالعزیز انٹرنیشنل ایئرپورٹ اور کنگ عبداللہ اکنامک سٹی سے گزرتی رہیں ۔