نئی دہلی یکم جولائی (سیاست ڈاٹ کام) آل انڈیا حج سیوا سمیتی نے دعویٰ کیا ہے کہ پچھلے پانچ برسوں میں حج تقریباً ایک لاکھ روپے مہنگا ہوا ہے ۔ بغیر سبسڈی کے بھی حج کے سستا ہونے سے متعلق مرکزی وزیر حج کے ایک بیان پر اپنے ردعمل میں سمیتی کے صدر حافظ نوشاد احمد اعظمی نے یہاں جاری ایک بیان میں کہا ہے کہ چونکہ حج عبادت ہے اس لئے ہندستانی مسلمان یہ گرانی برداشت کرنے پر مجبور ہیں۔ انہوں نے کہا کہ حکومت کو اس محاذ پر سنجیدگی اختیار کرنی چاہئے ۔ مزید یہ کہ ہندستانی حج کوٹہ دولاکھ بھی ناکافی ہے ۔ آبادی کے تناسب سے اسے چار لاکھ ہونا چاہئے ۔ مرکزی حج کمیٹی کے سابق رکن نے یہ بھی کہا کہ چونکہ عام مسلمان حج کمیٹی کے توسط سے سفر حج کرنا چاہتے ہیں اس لئے کمیٹی کے کوٹے میں زیادہ اضافہ ہونا چاہیئے ۔ نوشاد احمد اعظمی نے سفر حج کے لئے گلوبل ٹنڈر کے مطالبے کا بھی اعادہ کیا اور کہا کہ اس مطالبے کے تحت سپریم کورٹ میں داخل عرضداشت پر سنوائی چل رہی ہے ۔ اسی ماہ سماعت کی نئی تاریخ مقرر ہو سکتی ہے ۔عباس نقوی کے متعدد بیانات کے باوجود بھی حاجیوں کو بنیادی سہولتوں کی فراہمی میں کوئی پیش رفت نہیں ہورہی ہے۔
