سری نگر، 26 جون (سیاست ڈاٹ کام) بی جے پی کے ریاستی صدر رویندر رینہ نے کہا ہے کہ حریت کانفرنس کے لوگوں کے ساتھ کوئی بات چیت نہیں کی جانی چاہئے بلکہ انہیں ایسے جیلوں میں مقید کیا جانا چاہئے جہاں درجہ حرارت 70 ڈگری سنٹی گریڈ ہو۔ چہارشنبہ کے روز یہاں میڈیا کے ساتھ بات کرتے ہوئے ان کا کہنا تھا کہ حریت کے لوگوں کے ساتھ کوئی بات چیت نہیں ہونی چاہئے بلکہ انہیں جیلوں میں بند کیا جانا چاہئے ، آدھوں کو تہاڑ جیل بھیج دیا جانا چاہئے اور آدھوں کو جودھ پور جیل بھیج دیا جانا چاہئے ، 70 ڈگری جہاں درجہ حرارت ہوتا ہے حریت کے لوگوں کو ان ہی جیلوں میں بند کیا جانا چاہئے۔ رینہ نے کہا کہ بات چیت حریت کے بجائے جموں کشمیر کے ان لوگوں کے ساتھ ہونی چاہئے جنہیں گونا گوں مشکلات کا سامنا کرنا پڑا ہے ۔ انہوں نے کہا کہ اگر بات چیت ہونی چاہئے تو حریت کے بجائے ان لوگوں کے ساتھ ہونی چاہئے جن کے گھر قبرستان بن گئے، جن کو مصیبتیں جھیلنا پڑیں، ان لوگوں کے مسائل حل ہونے چاہئے، پنڈتوں کے ساتھ بات چیت ہونی چاہئے، گجر بکروالوں کے ساتھ بات چیت ہونی چاہئے، مغربی پاکستان کے پناہ گزینوں کے ساتھ بات چیت ہونی چاہئے اور کشمیر کے ان لوگوں چاہئے، وہ ہندو ہیں مسلم ہیں شیعہ ہیں سنی ہیں جنہوں نے قربانیاں دی ہیں، کے ساتھ بات چیت ہونی چاہئے۔
