انالاگ کے سربراہ الیکس کپمین کی چیف منسٹر ریونت ریڈی سے ملاقات، شہری مسائل کے حل پر بات چیت
حیدرآباد ۔ 20۔نومبر (سیاست نیوز) چیف منسٹر ریونت ریڈی نے کہا کہ حکومت حیدرآباد کو رہائش کے لئے بہترین اور موزوں مقام کے طور پر تبدیل کرنے کیلئے ٹکنالوجی کے مکمل استعمال اور شہری مسائل کے حل میں ہر ممکن تعاون اور حوصلہ افزائی کرے گی ۔ انہوں نے کہا کہ حیدرآباد کی شناخت عالمی سطح پر ایک کمپوزٹ سٹی کے طورپر ہے اور ملک کے تمام میٹرو پولیٹن شہروں میں حیدرآباد رہائش کیلئے بہترین مقام کے طورپر شناخت رکھتا ہے ۔ انفراسٹرکچر سہولتوں میں اضافہ کے سبب یہ کامیابی ملی ہے ۔ انالاگ آرٹیفشل انٹلیجنس کے چیف اگزیکیٹیوں آفیسر الیکس کپمین نے چیف منسٹر ریونت ریڈی سے ملاقات کی اور حیدرآباد میں شہری مسائل کا حل تلاش کرنے کیلئے ٹکنالوجی کے استعمال کے امکانات پر بات چیت کی۔ انہوں نے ٹریفک کے بہاؤ کو بہتر بنانے تالابوں اور جھیلوں کے تحفظ ، ماحولیاتی اور صنعتی آلودگی کے خاتمہ جیسے امور پر بات چیت کی۔ چیف منسٹر نے کہا کہ حکومت بھارت فیوچر سٹی کے قیام کے ذریعہ حیدرآباد کو ٹکنالوجی کے مرکز میں تبدیل کرنے کا منصوبہ رکھتی ہے ۔ اجلاس میں طئے کیا گیا کہ انالاگ آرٹیفشل انٹلیجنس کے اشتراک سے رئیل ٹائم سنسر نیٹ ورک تیار کیا جائے گا جس کے ذریعہ ٹریفک ، سیفٹی ماحولیات اور دیگر امور کا حل تلاش کیا جاسکتا ہے۔ الیکس کپمین نے فزیکل انٹلیجنس کی بڑھتی مانگ سے واقف کرایا اور کہا کہ آرٹیفشل انٹلیجنس اور دنیا کے درمیان خلیج کو کم کرنے میں یہ ٹکنالوجی کارگر ثابت ہوگی۔ چیف منسٹر نے بھارت فیوچر سٹی کی تعمیر میں کمپنی سے تعاون کی خواہش کی۔ انالاگ کے اشتراک سے حیدرآباد میں نصب کردہ ہزاروں کیمروں کا بہتر استعمال کرتے ہوئے سیفٹی کے اقدامات بہتر بنائے جائیں گے ۔ چیف منسٹر نے موسیٰ ندی ترقیاتی پراجکٹ کا حوالہ دیا اور کہا کہ ریاست میں تالابوں اور جھیلوں کے تحفظ کے اقدامات کئے جا رہے ہیں۔ انہوں نے پراجکٹ کی تکمیل میں انالاگ سے تعاون کا یقین دلایا۔ حیدرآباد کو ملک کے پہلے ڈیجیٹل انٹلیجنس شہر میں تبدیل کرنے کے لئے اقدامات کئے جائیں گے ۔ چیف منسٹر نے الیکس کپمین کو 8 اور 9 ڈسمبر کے گلوبل سمٹ میں شرکت کی دعوت دی۔1
