اقوام متحدہ ۔ 12 فبروری (سیاست ڈاٹ کام) اقوام متحدہ کے شعبہ انسداد دہشت گردی کے ایک سینئر عہدیدارنے کہا ہے کہ شام اور عراق میں دولت اسلامیہ ’داعش‘ کو کاری ضرب لگائی گئی مگر اس کے باوجود یہ گروپ عالمی سلامتی کے لیے بدستور خطرہ ہے۔خبر رساں اداروں کے مطابق اقوام متحدہ کے انسداد دہشت گردی شعبے کے سینئر عہدیدار ولادی میر فورنکوف نے پیر کو سلامتی کونسل کو بریفنگ دیتے ہوئے کہا کہ داعش کی صفوں میں لڑنے والے ہزاروں جنگجو یا تو روپوش ہوگئے یا اپنے ملکوں کو واپس لوٹ گئے ہیں۔ بہت سے جنگجووں کو گرفتار کرنے کے بعد رہا کردیا گیا۔انہوںنے کہا کہ ’شام اور عراق کی سرزمین داعش کیلئے اب بھی پرکشش ہے، جہاں اس کے جنگجووں کی تعداد 14 سے 18 ہزار کے درمیان ہے‘۔یو این عہدیدار کا کہنا تھا کہ داعش نے اعلانیہ کارروائیوں کے بجائے خفیہ نیٹ ورک بنا لیا ہے اور اس میں علاقائی جنگجوؤں کے علاوہ عالمی جنگجوؤں کی بھی بڑی تعداد موجود ہے۔ یہ گروپ اب گوریلا کارروائیوں کے ذریعے امن وامان تباہ کرنے کی کوشش کرے گا۔
