دنیا تباہی کے دہانے پر، بل گیٹس کا انتباہ

واشنگٹن، 21 اکتوبر (یواین آئی) امریکی ارب پتی اور مائیکروسافٹ کے بانی بل گیٹس نے فرانسیسی اخبار ایل ایکسپریس کو دیے گئے انٹرویو میں دنیا کو “خطرناک موڑ” پر ہونے کا انتباہ دیا ہے ، جہاں قوم پرستی، سکڑتے ترقیاتی فنڈز اور ماحولیاتی بحرانات انسانیت کو بربادی کی طرف دھکیل رہے ہیں۔ ان کے مطابق آئندہ 20 سال مستقبل کا تعین کریں گے ، جبکہ غریب دنیا غذائی، صحت اور موسمیاتی چیلنجز کا شکار ہے ، اور امیر ممالک اندرونی مسائل میں الجھے ہوئے ہیں۔ تاہم بچوں کی اموات میں کمی اور ٹیکنالوجی کی صلاحیتوں کو امید کی کرن قرار دیتے ہوئے گیٹس نے عالمی تعاون، سمجھدار پالیسیاں اور منصفانہ وسائل کی تقسیم پر زور دیا، اور اپنی فلاحی فاؤنڈیشن کو 25 سال بعد ختم کرنے کا اعلان بھی کیا تاکہ وسائل کا بروقت استعمال یقینی ہو۔گیٹس کے مطابق امیر ممالک اندرونی مسائل میں الجھ رہے ہیں جبکہ غریب دنیا شدید ماحولیاتی، غذائی اور صحت کے بحرانوں کا سامنا کر رہی ہے ۔ سال 2023 میں ترقیاتی امداد تقریباً 5 فی صد کم ہوئی، حالانکہ ضرورت اس سے کہیں زیادہ ہے ۔ انھوں نے کہا کہ “اندرونی مفادات پر مرکوز ہونے کا رجحان پہلے کبھی اتنا طاقت ور نہیں تھا”، جس کے نتیجے میں عالمی ذمہ داریوں کا احساس کمزور پڑ رہا ہے ۔