کولمبو ۔13 ستمبر (سیاست ڈاٹ کام ) سری لنکا ئی کرکٹ بورڈ نے کہا ہے کہ انہیں انتباہ ملا ہے کہ ٹیم کو پاکستان کے دورے میں ایک دہشت گرد حملے کا نشانہ بنایا جاسکتا ہے۔ رپورٹ کے مطابق سری لنکا کے بورڈ نے کہا ہے کہ وزیر اعظم کے دفتر نے ہدایت جاری کی ہے کہ مختصر طرزکی کرکٹ کے 6 میچوں کے دورے میں سری لنکائی ٹیم کے خلاف ممکنہ دہشت گرد خطرے کے حوالے سے باوثوق معلومات ملنے کے بعد صورت حال کا دوبارہ جائزہ لیا جائے۔ سری لنکا کی حکومت کو سیکیورٹی کی صورت حال کا جائزہ لینے کی ہدایت دی جائے گی۔خیال رہے کہ سری لنکن بورڈ کی جانب سے دہشت گرد حملے کے حوالے سے بیان دورے کے لیے ٹیم کے اعلان کے کچھ دیر بعد آیا ہے۔ پاکستان کرکٹ بورڈ (پی سی بی) نے اپنے ردعمل میں کہا ہے کہ ہم نے سری لنکا کرکٹ کا بیان دیکھا ہے لیکن سری لنکن ٹیم کی حفاظت کے حوالے سے معلومات یا انٹیلی جنس رپورٹ خفیہ نہیں ہے۔پی سی بی کے بموجب پی سی بی مکمل تحفظ فراہم کرنے اور سری لنکا کی ٹیم کو سیکیورٹی دینے کے لیے پرعزم ہے اور اس حوالے سے سری لنکا کرکٹ کیساتھ کام جاری رکھا جائے گا۔یاد رہے کہ سری لنکا کی ٹیم پر مارچ 2009 میں لاہور میں حملہ ہوا تھا جس کے بعد اکتوبر2017 میں ٹی ٹوئنٹی سیریز کے لیے پاکستان آئی تھی۔ لاہور حملے میں 8 افراد جاں بحق ہوئے تھے جبکہ سری لنکا کی ٹیم کے کھلاڑیوں اور عملہ سمیت 7 افراد زخمی ہو گئے تھے۔ قبل ازیں سری لنکا کرکٹ بورڈ نے دورہ پاکستان کے لئے ونڈے اور ٹی ٹوئنٹی ٹیموں کا اعلان کردیا تھا۔ سیریز کا آغاز 27 ستمبر کو کراچی میں میں ہوگا جہاں پہلا ونڈے کھیلا جائے گا۔ٹی ٹوئنٹی سیریز کے تمام میچز لاہور میں کھیلے جائیں گے ۔
