ممبئی ، یکم ؍ستمبر (ایجنسیز) کرکٹ بورڈ (بی سی سی آئی) نے سابق کپتان مہندر سنگھ دھونی کو ابتدائی طور پر ٹی20 ورلڈکپ 2026 کیلئے مینٹور شپ کی پیشکش کی ہے، اگر وہ اسے قبول کرلیتے ہیں تو انہیں تمام فارمیٹس کا مینٹور بنائے جانے کا امکان ہے۔ میڈیا رپورٹس کے مطابق ایم ایس دھونی فی الحال یہ ذمہ داری قبول کرنے کے لیے تیار نہیں ہیں۔ ذرائع نے بتایا ہے کہ دھونی کے انکار کی وجہ ٹیم انڈیا کے ہیڈ کوچ گوتم گمبھیر ہیں، کیونکہ دھونی نہیں چاہتے جب تک گمبھیر تینوں فارمٹس کے ہیڈ کوچ ہیں، وہ یہ کردار سنبھالیں۔ دھونی اور گمبھیر کے درمیان پرانے اختلافات ہیں اور ذرائع کا ماننا ہے کہ دھونی کسی ایسے منظرنامہ سے بچنا چاہتے ہیں جہاں ان کی ذمہ داریاں گمبھیر کے کردار سے ٹکرائیں یا تناؤ کی صورتحال پیدا ہو۔ 2021 کے ٹی20 ورلڈ کپ میں روی شاستری کی کوچنگ کے دوران دھونی کو صرف اسی ٹورنامنٹ کے لیے مینٹورشپ آفر کی گئی تھی لیکن بورڈ کی حالیہ پیشکش بہت زیادہ وسیع ہے۔ بی سی سی آئی چاہتا ہے کہ دھونی اپنی خدمات انڈیا کی تمام نیشنل ٹیموں (سینئرز، جونیئرز، اور ممکنہ طور پر ویمنز ٹیم) کیلئے فراہم کریں تاکہ اپنے وسیع تجربے سے وہ نئے ٹیلنٹ کی رہنمائی کر سکیں۔ بی سی سی آئی ذریعہ نے تصدیق کی کہ دھونی کو ایک بار پھر انڈین کرکٹ کا مینٹور بننے کی پیشکش کی گئی ہے، بورڈ کا ماننا ہے کہ ہندوستان کے سب سے کامیاب کپتان دھونی کی رہنمائی نئی نسل کے کرکٹرز کی تشکیل میں اہم کردار ادا کر سکتی ہے۔ اگر یہ معاہدہ طے پایا تو دھونی کی انٹرنیشنل ریٹائرمنٹ (2020) کے بعد انڈین کرکٹ کے آفیشل سٹ اپ میں پہلی طویل میعادی واپسی ہوگی۔
