لندن۔13 جولائی (سیاست ڈاٹ کام) سابق ہندوستانی کپتان اور موجودہ کمنٹیٹر سنیل گواسکر نے نیوزی لینڈ کے خلاف سیمی فائنل میں مہندر سنگھ دھونی جیسے تجربہ کار کھلاڑی کو بیٹنگ میں نیچے بھیجنے پر ٹیم انتظامیہ کو تنقید کا نشانہ بنایا ہے۔گواسکر نے دھونی کو بلے بیٹنگ میں ساتویں نمبر پر بھیجنے پر ناراضگی کا اظہار کرتے ہوئے ٹیم انتظامیہ کے فیصلے کو خطرناک قراردیا ہے۔ ہندوستان کو اس مقابلے میں 18 رنز سے شکست کا سامنا کرنا پڑا اور ٹیم ورلڈکپ سے باہر ہوگئی۔ ہندستان240 رنز کے ہدف کا تعاقب کرتے ہوئے اپنے تین وکٹ محض پانچ رن پرگنوا چکا تھا۔ ان حالات میں امید تھی کہ اننگز کو سنبھالنے کے لئے دھونی کو اوپر بھیجا جائے گا لیکن ٹیم مینجمنٹ نے انہیں رشبھ پنت، دنیش کارتک اورہاردک پانڈیا کے بعد ساتویں نمبر پر بھیجا۔ ٹیم انتظامیہ کے اس فیصلے کی ہر جگہ سخت تنقید ہو رہی ہے اورگاوسکر جیسے بڑے کھلاڑی نے بھی کہا ہے کہ دھونی کو اوپر بھیجا جانا چاہیے تھا۔ہندستان کے چار وکٹ 10 اوور میں 24 رن پر گر چکے تھے۔ سب کو امید تھی کہ دھونی میدان پر اتریں گے لیکن پنت کا ساتھ دینے پانڈیا میدان پر آئے۔گواسکر نے کہاکہ چوتھا وکٹ گرنے کے بعد پنت کا ساتھ دینے دھونی کو میدان پر آنا چاہئے تھا کیونکہ ان جیسا تجربہ کار کھلاڑی ایک نوجوان کھلاڑی کو دباو کے حالات میں تحمل سے کھیلنے کے لئے حوصلہ دے سکتا تھا۔انہوں نے کہاکہ 24 رن پر چار وکٹ کے اسکور کے وقت آپ دو ایسے کھلاڑیوں کو نہیں اتار سکتے جو جارحانہ انداز سے کھیلتے ہیں اور زیادہ تجربہ کار بھی نہیں ہے۔ پنت اور پانڈیا دونوں ہی جارحانہ کھلاڑی ہیں اور اگر پنت کا ساتھ دینے دھونی اترتے تو وہ اس نوجوان کھلاڑی کو سمجھا سکتے تھے۔
