نئی دہلی، 23مئی (یو این آئی) ہندوستان پہلگام دہشت گردانہ حملے سے پیدا ہونے والے حالات کے درمیان پاکستان کے خلاف دہشت گردی کی مالی معاونت کو لے کر کثیر الجہتی ادارہ فنانشل ایکشن ٹاسک فورس کو نیا ڈوزیئر دینے کی تیاری کر رہا ہے ۔ ذرائع نے یہاں بتایا کہ ہندوستان ایف اے ٹی ایف سے مطالبہ کرے گا کہ پاکستان کو دوبارہ گرے لسٹ (مشکوک ممالک کی فہرست) میں ڈال کر اس کے خلاف کارروائی کی جائے ۔ پیرس میں قائم یہ تنظیم منی لانڈرنگ اور دہشت گردی کی مالی معاونت پر نظر رکھتی ہے اور اس میں ہندوستان سمیت 39ممالک شامل ہیں۔
اعلیٰ سطحی ذرائع نے جمعہ کو یہاں بتایا کہ پاکستان کو دوبارہ ‘گرے لسٹ’ میں ڈالنے کیلئے ہندوستان ایف اے ٹی ایف کے سامنے ایک مضبوط کیس پیش کرے گا۔ پاکستان اپنی سرزمین میں پروان چڑھنے والی دہشت گردی کے خلاف کارروائی کرنے میں ناکام رہا ہے اور وہ کثیرالجہتی ایجنسیوں سے ملنے والے فنڈز کو اسلحہ اور گولہ بارود کی خریداری اور دہشت گردوں کی حمایت کیلئے استعمال کر رہا ہے ۔
ذرائع نے بتایا کہ ہندوستان اس ڈوزیئر میں خاص طور پر ان قانونی التزامات کی نشاندہی کرے گا جن کی تعمیل کا پاکستان کے وعدے پر اسے 2022 میں ایف اے ٹی ایف کی گرے لسٹ سے نکال دیا گیا تھا لیکن وہ ان کی تعمیل نہیں کر رہا ہے ۔