نئی دہلی: دیوالی سے دو دن قبل منگل کو دہلی میں ہوا کا معیار خراب زمرے میں پہنچ گیا جبکہ پیر کی رات موسم کی سب سے سرد رات رہی۔ محکمہ موسمیات نے کہاکہ دارالحکومت میں درجہ حرارت 13.6 ڈگری سیلسیس تک گر گیا جو معمول سے 2 ڈگری کم ہے۔ منگل کو آسمان جزوی طور پر ابرآلود رہے گا اور زیادہ سے زیادہ 30 ڈگری سیلسیس جبکہ کم سے کم درجہ حرارت 15 ڈگری ریکارڈ کیا گیا۔منگل کو ہوا کے معیار کی سطح 314 پر رہی اور آلودگی کی وجہ سے چہارشنبہ اور جمعرات کودہلی میں ہوا کا معیار بہت خراب رہے گا۔ دوسری جانب آئندہ جمعہ اور ہفتہ کو بھی ہوا کا معیار انتہائی خراب حالت میں رہے گا۔ پرالی جلانے کی وجہ سے پی ایم 2.5 کا لیول منگل اور چہارشنبہ کو 5 فیصد سے کم رہنے کی توقع ہے کیونکہ ہوا کا رخ مخالف سمت میں ہے اور اس کی وجہ سے ہوا میں آلودگی کی مقدار کم ہو سکتی ہے ۔ دریں اثناء پرالی جلانے کے واقعات میں بھی اضافہ ہوا ہے جس کی وجہ سے پیر کو پنجاب میں 1796، ہریانہ میں 124اور اترپردیش میں 157 مقامات پر پرالی جلائی گئی ۔
