نئی دہلی: وزیر اعلی اروند کجریوال نے منگل کو کہا کہ دہلی حکومت کی خدمات اور معلومات اب ایک کلک پر دستیاب ہوں گی۔ کجریوال نے منگل کو دہلی حکومت کے ویب پورٹل کے ساتھ مختلف محکموں کی 180 ویب سائٹس کو لانچ کیا۔ اس دوران انہوں نے آئی ٹی ڈپارٹمنٹ کو مبارکباد دیتے ہوئے کہا کہ دہلی حکومت کے 50 محکموں کی 180 ویب سائٹس شروع کی گئی ہیں۔ تمام ویب سائٹس دہلی حکومت کے ویب پورٹل کے ساتھ مربوط ہیں۔ اس سے قبل 2008 میں دہلی حکومت کی ویب سائٹ بنائی گئی تھی جو پرانی ٹیکنالوجی پر مبنی تھی اور سرور بھی پرانی ٹیکنالوجی پر تھے ۔ وہ ویب سائٹ موبائل اور ٹیب فرینڈلی نہیں تھی۔ ان تمام باتوں کو مدنظر رکھتے ہوئے اب ہم کلاؤڈ پر چلے گئے ہیں اور سرورز کی ضرورت ختم ہو گئی ہے ۔ انہوں نے کہا کہ کووڈ کے دوران دہلی حکومت نے کچھ اسکیموں کا اعلان کیا تھا۔ اس دوران ویب سائٹ پر ٹریفک اچانک بڑھ گئی اور سرور بھی کریش ہو گئے لیکن اب ایسا نہیں ہو گا۔ اب ہمارے پاس جدید ترین ٹیکنالوجی ہے اور کافی اسپیس ہے ۔
