نئی دہلی، 27 فروری (یو این آئی)یوتھ کانگریس نے ‘بھارت منڈپم’ واقعے کے تناظر میں اپنے کارکنوں کے خلاف درج کی گئی ایف آئی آر کو جھوٹی اور سیاسی انتقام پر مبنی قرار دیا۔ تنظیم کا کہنا ہے کہ حکومت کا یہ قدم امریکہ کے ساتھ کیے گئے تجارتی معاہدے کے خلاف اٹھنے والی آوازوں کو کچلنے کی ایک منظم کوشش ہے ۔یوتھ کانگریس کے قومی ترجمان ورون پانڈے نے جمعہ کو جاری کردہ ایک بیان میں دہلی پولیس کے تمام دعووں کو یکسر مسترد کر دیا۔ انہوں نے کہا کہ حکومت اس طرح کے ہتھکنڈوں کے ذریعے تجارتی معاہدے کی خامیوں سے عوام کی توجہ بھٹکانا چاہتی ہے ۔ترجمان نے واضح کیا کہ کارکنوں کی نعرہ بازی میں کوئی بھی بات ‘ملک دشمنی’ کے زمرے میں نہیں آتی۔ پولیس کے تمام الزامات بے بنیاد ہیں اور ویڈیو شواہد اس کی تصدیق کرتے ہیں۔
ورون پانڈے نے سول افسران پر حملے کے الزامات کو بھی لغو قرار دیتے ہوئے کہا”یوتھ کانگریس کے کارکنوں نے گاندھیائی عدم تشدد کی روایت کے مطابق احتجاج کیا ہے ۔ ہمارا ایمان جمہوری اور پرامن طریقے سے اپنی بات رکھنے پر ہے ۔انہوں نے ٹی شرٹ چھپوانے اور ایونٹ رجسٹریشن جیسی عام سرگرمیوں کو ‘سازش’ قرار دینے پر دہلی پولیس کا مذاق اڑاتے ہوئے اسے مضحکہ خیز قرار دیا۔امریکہ کے ساتھ ہونے والے تجارتی معاہدے کو نشانہ بناتے ہوئے یوتھ کانگریس نے کہا کہ یہ معاہدہ معاشرے کے کمزور اور پسماندہ طبقات کی معاشی سلامتی پر حملہ ہے ۔ چند مراعات یافتہ لوگوں کے فائدے کے لیے غریبوں کے روزگار کی قربانی دی جا رہی ہے ، جس کے خلاف ان کی جدوجہد جاری رہے گی۔
