پونے میں سابق چیف منسٹر کو شدید مخالفت کا سامنا‘ بی جے پی کیخلاف نعرہ بازی
ممبئی :مہاراشٹرا کے پونے میں دیویندر فڈنویس کو لگاتار مخالفت کا سامنا کرنا پڑ رہا ہے۔ ایسا ہی کچھ کل6 مارچ کو دیکھنے کو ملا جب نہ صرف فڑنویس کی کار پر ایک شخص نے چپل پھینک دی، بلکہ فڑنویس اور بی جے پی کے خلاف خوب نعرے بازی بھی ہوئی۔ میڈیا رپورٹس کے مطابق اتوار کو پمپری۔چنچوڈ علاقے میں بی جے پی اور این سی پی کارکنان ایک دوسرے کے سامنے آ گئے۔ دونوں پارٹیوں کے کارکنان کے درمیان تصادم کا ماحول پیدا ہو گیا۔ اس درمیان این سی پی کارکنان نے ’مودی چور ہے‘ جیسے نعرے بلند کرنے لگے۔بتایا جاتا ہے کہ اس نعرے بازی کے درمیان ہی کئی این سی پی کارکنان نے مہاراشٹراکے سابق وزیر اعلیٰ اور مہاراشٹرا اسمبلی میں اپوزیشن لیڈر دیویندر فڑنویس کی کار پر حملہ کر دیا۔ ایک شخص نے اپنی چپل اتار کر کار کی طرف پھینکی۔ ماحول خراب ہوتا ہوا دکھائی پڑ رہا تھا لیکن پولیس نے لاٹھی چارج کر کے کسی طرح حالات کو قابو میں کیا۔واضح رہے کہ فڈنویس ترقیاتی کاموں کا افتتاح کرنے کے لیے پمپری۔چنچوڈ پہنچے تھے۔ اسی وقت بی جے پی اور این سی پی کارکنان ایک دوسرے کے سامنے آ گئے۔ فڑنویس کو اس دوران کافی مشکلات کا سامنا کرنا پڑا۔ پولیس کی تگ و دو کے بعد حالات بہتر ہوئے۔