نئی دہلی ۔ 13 ستمبر (سیاست ڈاٹ کام) اسٹار کھلاڑی رانی رامپال کو دورہ انگلینڈ کیلئے معلنہ 18 رکنی ہندوستانی خاتون ہاکی ٹیم کیلئے کپتان مقرر کیا گیا ہے۔ ہندوستانی ٹیم دورہ انگلینڈ پر 5 مقابلوں کی سیریز میں شرکت کرے گی جس کا 27 ستمبر کو آغاز ہوگا۔ ہندوستانی ہاکی ٹیم کی جہاں رانی رامپال کو قیادت دی گئی ہے وہیں گول کیپر کویتا ان کی نائب ہوں گی۔ انگلینڈ اور ہندوستان کے درمیان پانچ مقابلوں کی یہ سیریز 27 ستمبر تا 4 اکٹوبر کے درمیان کھیلی جائے گی۔ سبیتا اور رجنی ایتی مارپو ٹیم میں اپنا مقام برقرار رکھنے میں کامیاب ہوئی جیسا کہ وہ جاپان میں منعقدہ اولمپک ٹسٹ ایونٹ میں کامیاب ہندوستانی ٹیم کا حصہ تھی۔ علاوہ ازیں ڈیفنڈرس دیپ گریس ایکا، گرجیت کور، رینا کھوکر اور سلیماتیتی کو بھی ٹیم میں شامل کیا گیا ہے۔ مڈفیلڈ میں تجربہ کار نمیتا توپو کی زخموں سے صحتیابی کے بعد واپسی ہوئی ہے۔ علاوہ ازیں اس شعبہ میں تجربہ کار کھلاڑیوں میں شامل سشیلاچنوکوکارمبم، نیکی پردھان، مونیکا، نیہا گوئل اور لیلیمامنز کو شامل کیا گیا ہے۔ فارورڈ لائن میں رانی، وندنا کتریا، نونیت کور، لال ریم سیمی، نوجوت کور اور نوجوان شرمیلا دیوی کو بھی موقع دیا گیا ہے جنہوں نے اولمپک ٹسٹ ایونٹ میں بین الاقوامی کریئر کا آغاز کیا ہے۔ معلنہ ٹیم پر اظہارخیال کرتے ہوئے چیف کوچ ایس میرجنی نے کہا ہیکہ ہماری ٹیم تجربہ کار اور نوجوان کھلاڑیوں پر مشتمل ہے۔ نیز اس طرح متوازن ٹیم کا انتخاب دراصل ٹوکیو اولمپکس 2020ء میں رسائی ہے۔ انہوں نے مزید کہا کہ نمیتا کی ٹیم میں واپسی خوش آئند ہے کیونکہ ایشین گیم 2018ء کے بعد وہ پہلی مرتبہ ایکشن میں دکھائی دیں گی۔ نیز انگلینڈ روانگی سے قبل ہمارے پاس 10 دنوں کا وقت ہے جس میں ٹریننگ کی جائے گی۔ کوچ نے اس امید کا اظہار بھی کیا ہیکہ انگلینڈ کے خلاف ہونے والی سیریز امریکہ کے خلاف نومبر 2019ء میں اوڈیشہ میں منعقد شدنی ایف آئی ایچ ہاکی اولمپکس کوالیفائرس کی بہتر تیاری کا موقع ہوگی۔ کوچ نے مزید کہاکہ مذکورہ سیریز امریکی ٹیم کے خلاف کھیلے جانے والے مقابلوں کیلئے بہترین تیاری ہوگی کیونکہ حریف ٹیم کا کھلاڑی اپنے ہی ملک میں سامنا کریں گے۔
