پوچھ تاچھ میں کنٹر اداکارہ کا حیران کرنے والا انکشاف
بنگلورو :ٹامل فلم انڈسٹری کی مشہور اداکارہ اور آئی پی ایس افسر کی بیٹی رانیا راؤ نے ایک حیران کرنے والا انکشاف کیا ہے۔ رانیا نے کہا ہے کہ انہوں نے پہلی بار سونے کی اسمگلنگ کی تھی اور اسے چھپانے کا طریقہ یوٹیوب سے سیکھا تھا۔ انہوں نے یہ بات پوچھ تاچھ کر رہے عہدیداروں کو بتائی۔ذرائع کے مطابق رانیا نے کہا کہ اس نے اسمگلنگ کا طریقہ یوٹیوب پر دیکھا اور اس کے بعد اسی تکنیک پر عمل کیا۔ رانیا کا کہنا تھا کہ وہ اسمگلنگ کیلئے استعمال کیے جانے والے راستوں اور چھپانے کے طریقوں کو جاننے کے لیے آن لائن ویڈیو ٹیوٹوریلس کا سہارا لے رہی تھی۔رانیا راؤ پر الزام ہے کہ انہوں نے کچھ غیر ملکی اسمگلروں کے ساتھ مل کر سونے کی اسمگلنگ کی اور اس کے لیے مختلف چھپانے کے طریقے اپنائے۔ حالانکہ رانیا نے دعویٰ کیا ہے کہ وہ اس سرگرمی میں انجانے میں شامل ہوئیں تھیں۔واضح رہے کہ کرناٹک کے بنگلورو میںواقع کیمپے گوڑا بین الاقوامی ہوائی اڈے پر کنڑ اداکارہ رانیا راؤ کے پاس سے 14.2 کلوگرام سونے کی اینٹیں ضبط کی گئی تھیں جن کی تخمینی قیمت 12.56 کروڑ روپے ہے۔ ڈائرکٹوریٹ آف ریونیو انٹلیجنس نے یہ اطلاع دی تھی۔پولس کے ایک عہدیدارکے مطابق اداکارہ رانیا راؤ انڈین پولیس سروس کے سینئر افسر رام چندر راؤ کی بیٹی ہیں۔ انہوں نے بتایا کہ رام چندر راؤ حال میں کرناٹک اسٹیٹ پولیس ہاؤسنگ اینڈ انفرااسٹرکچر ڈیولپمنٹ کارپوریشن لمیٹڈ کے چیئر مین اور منیجنگ ڈائریکٹر کے عہدے پر ہیں۔اس معاملے میں کْل 17.29 کروڑ روپے کی قیمت کی اشیاء ضبط کی گئی جس میں 4.73 کروڑ روپے قیمت کی دیگر چیزیں بھی شامل ہیں۔ ڈی آر آئی عہدیداروں کے مطابق 14.2 کلوگرام سونے کی یہ کھیپ حال کے دنوں میں بنگلورو ہوائی اڈے پر ہوئی سب سے بڑی ضبطیوں میں سے ایک ہے۔