رانچی: جھارکھنڈ میں ہتک عزت کیس میں چائی باسا میں واقع ایم پی، ایم ایل اے کی خصوصی عدالت کے ذریعہ کانگریس کے رکن پارلیمنٹ راہول گاندھی کے خلاف 27 فبروری 2024 کو جاری غیر ضمانتی وارنٹ کو چیلنج کرنے والی درخواست کی سماعت آج جھارکھنڈ ہائیکورٹ میں ہوئی۔اس معاملے میں، جھارکھنڈ ہائیکورٹ نے راہول گاندھی کے خلاف چائی باسا کی ایم پی، ایم ایل اے کورٹ کی طرف سے جاری کیے گئے غیر ضمانتی وارنٹ کو ایک ماہ کیلئے شرط کے ساتھ ملتوی کردیا۔ نیزراہول گاندھی کو ہدایت دی گئی ہے کہ وہ مقدمے کا سامنا کرنے کیلئے قانون کے مطابق مناسب اقدامات کریں۔ اس کے ساتھ ہی عدالت نے راہول گاندھی کی عرضی کا تصفیہ کردیا۔ سال 2018 میں بھارتیہ جنتا پارٹی کو لے کر راہول گاندھی کی جانب سے قابل اعتراض تبصرہ کیا گیا تھا۔ اس سلسلے میں بی جے پی لیڈر پرتاپ کٹیار کی جانب سے چائی باسہ کورٹ میں چیف جوڈیشیل مجسٹریٹ کی عدالت میں شکایت درج کروائی گئی تھی، بعد میں کیس کو ایم پی، ایم ایل اے کورٹ چائی باسہ میں منتقل کردیا گیا۔
