اداکارہ سے سیاستداں بننے والی ارمیلا ماتونڈ کر کی پولیس میں شکایت ، تحفظ طلبی
ممبئی 15،اپریل (سیاست ڈاٹ کام) ممبئی شمالی ضلع لوک سبھا حلقہ کی کانگریسی امیدوار اداکار اُرمیلا ماتونڈکر کی ایک ریلی میں بی جے پی اور کانگریس کے ورکروں میں جھڑپ ہوئی ہے ،اس جلسہ کو امیدوار خطاب کررہی تھیں،تب یہ واقعہ پیش آیا ہے ۔بتایا جاتا ہے کہ بوریولی ریلوے اسٹیشن کی مغربی سمت تصادم اُس وقت پیش آیا ،جب اُرمیلا جم غفیر سے خطاب کررہی تھیں اوربی جے پی کے چند ورکروں نے جلسہ کے مقام کو لیکر اعتراض کیا۔بی جے پی ورکرس مودی مودی کے نعرے لگانے لگے ۔اس کے جواب میں کانگریسیوں نے ’’مودی چورہے‘‘ کے نعرے لگائے۔ اُرمیلا ماتونڈکر کی تقریر کے دوران دونوں پارٹیوں کے ورکرس میں تصادم ہوگیا اور وہ آزادنہ طورپر ایک دوسرے کو ڈھکیلنے لگے اور کچھ دیر بعد ان کے درمیان لات اور گھونسیں چلنے لگے ،جس سے افراتفری پھیل گئی۔ اداکارہ سے سیاستداں بننے والی ارمیلا ماتونڈکر نے پولیس میں اس کی شکایت درج کروائی اور پولیس سے اپنے کارکنوں کیلئے تحفظ طلب کیا۔ وہ ممبئی شمالی سے کانگریس کی لوک سبھا امیدوار ہیں۔