نئی دہلی : چین نے نئے نقشے میں اروناچل پردیش کو اپنا قرار دے دیا ہے۔ سبرامنیم سوامی نے اس کیلئے مودی حکومت پر طنز کیا ہے۔ بی جے پی لیڈر سبرامنیم سوامی نے چین کے اس نئے نقشے پر طنزیہ ردعمل دیا ہے۔ سبرامنیم سوامی نے کہاکہ ’’مودی کو بتائیں کہ اگر وہ کسی مجبوری کی وجہ سے مادر ہند کی حفاظت نہیں کرسکتے تو کم از کم عہدے سے دستبردار ہو کر مرگدرشک منڈل میں چلے جائیں۔ بھارت کو جھوٹ سے نہیں بچایا جا سکتا۔ یہ نقشہ ایسے وقت میں جاری کیا گیا ہے جب کچھ دن پہلے برکس کانفرنس کے دوران پی ایم مودی اور چینی صدر ژی جن پنگ نے سرحدی تنازعہ پر بھی بات کی۔
اس سے قبل اپریل 2023 میں چین کی شہری امور کی وزارت نے اروناچل پردیش میں 11 مقامات کے نام تبدیل کرنے کی منظوری دی تھی۔چین اروناچل پردیش میں 90 ہزار مربع کلومیٹر زمین پر دعویٰ کرتا ہے جب کہ بھارت کا کہنا ہے کہ چین نے مغرب میں اکسائی چن کے 38 ہزار مربع کلومیٹر علاقے پر غیر قانونی قبضہ کر رکھا ہے۔
