نئی دہلی: سبزیوں کے بعد اب مصالحہ جات کی قیمتوں میں بھی زبردست اضافہ ہوگیا ہے اور مصالحہ جات میں بھی آگ لگ گئی ہے جو عام آدمی کی دسترس سے باہر ہورہے ہیں۔ گزشتہ سال کے مقابلے اس سال بعض مصالحوں کی قیمتیں آسمان پر جا پہنچی ہیں۔ زیرے کی قیمتوں میں سب سے زیادہ اضافہ دیکھا جا رہا ہے۔ اس کی خوردہ قیمتوں میں گزشتہ ماہ سالانہ بنیادوں پر تقریباً 75 فیصد اضافہ ہوا ہے۔رپورٹ کے مطابق زیرہ کے دام اس وقت 60 ہزار روپے کونٹل کے قریب پہنچ چکے ہیں۔ اس سے کسانوں کو تو فائدہ ملے گا لیکن نچلے اور متوسط طبقہ کے لوگوں نے تڑکے اور بگھار کیلئے دوسرے متبادل ڈھونڈھ لیے ہیں۔
لوگ تڑکے میں رائی اور پیاز کا استعمال کرنے لگے ہیں۔ماہرین کے مطابق موسم کی خرابی اور پیداوار میں کمی کے باعث مصالحہ جات کی قیمتیں بڑھ رہی ہیں۔ خاص طور پر زیرے کی قیمتوں میں ریلیف کے امکانات فی الحال نظر نہیں آ رہے۔ زیرہ سال میں ایک بار اگائی جانے والی فصل ہے اور اس سال اسے تقریباً 30 سے 40 فیصد تک نقصان پہنچا ہے۔ماہرین کے مطابق غیر موسمی بارشوں اور ژالہ باری کے باعث ہلدی جیسی کئی فصلوں کی بوائی میں زبردست کمی آئی ہے۔ راجستھان میں بپر جوئے طوفان کی وجہ سے دھنیا کی فصل تباہ ہو چکی ہے۔ آندھرا پردیش اور تلنگانہ میں کم بارش کی وجہ سے خشک مرچوں کی پیداوار میں کمی آئی ہے۔خیال رہے کہ جنوری 2023 کے بعد مصالحوں کی قیمتوں میں کمی آئی تھی۔ اس کے بعد مصالحہ جات کی قیمتوں میں سالانہ بنیادوں پر 21 فیصد مہنگائی ہوئی لیکن گزشتہ ماہ سے ایک بار پھر مصالحوں کی قیمتوں میں اضافہ ہوا ہے۔
