حیدرآباد،24 جنوری (یو این آئی) سرفرازخان ہندوستانی کرکٹ ٹیم کے سابق کپتان محمد اظہرالدین کے ویڈیوز دیکھ کر بڑے ہوئے ہیں اور یہاں حیدرآباد میں ایلیٹ گروپ ڈی میچ میں حیدرآباد کے خلاف ڈبل سنچری(227) بنانے کے بعد ممبئی کے اس بیٹر نے اپنی شاندار کارکردگی کا سہرا سابق ہندوستانی کپتان کو دیا۔ جبکہ اظہر نے کہا کہ سارا سہرا کھلاڑی کو ہی ملنا چاہیے ۔ اظہر نے کرک بج سے کہا کہ سارا سہرا سرفراز کو ملنا چاہیے ۔ مجھے کیوں؟’سرفراز کے پہلے128 رنز پر ناٹ آؤٹ رہنے کے بعد ڈبل سنچری مکمل کرنے کے چند گھنٹے بعد وہ میرے دفتر آئے اور ان کے کچھ سوالات تھے ، میں نے انہیں کچھ باتیں بتائیں۔ یہ میرا فرض ہے اور میں نے اسے سمجھایا کہ یہ کام کیسے کیا جانا چاہیے ۔ میں انہیں اس شاندار اننگز پر مبارکباد دیتا ہوں۔ اظہر نے یہ بتانے سے انکار کردیا کہ سوالات کیا تھے ، یہ کہتے ہوئے کہ اس کے بارے میں بیٹر سے ہی پوچھا جانا چاہیے ۔ تاہم ان کا ماننا تھا کہ سرفرازکو ہندوستان کے لیے منتخب کیا جانا چاہیے ۔ انہوں نے اچھی کارکردگی دکھائی ہے ۔ انہیں ہندوستانی ٹیم کے لیے منتخب کیا جانا چاہیے ، انہیں مواقع نہیں مل رہے ہیں۔ وہ ایک جارحانہ بیٹر ہیں اور انہیں زیادہ مواقع نہیں ملے ہیں۔ سرفراز نے جو چھ ٹسٹ میچ کھیلے ہیں، ان میں انہوں نے ایک سنچری بنائی ہے ۔ انہوں نے نومبر2024 کے بعد سے ہندوستان کے لیے کوئی میچ نہیں کھیلا ہے ۔28 سالہ سرفراز جو ممبئی کی بیٹنگ کا اہم ستون ہیں، نے انکشاف کیا کہ میچ سے ایک دن قبل گفتگو کے دوران انہوں نے اظہر سے کیا سیکھا۔ دوہری سنچریاں خاص ہوتی ہیں، اچھا لگا، پچ اتنی آسان نہیں تھی۔گیند کبھی کبھی نیچی رہ جا رہی تھی۔ اس وکٹ پر وہی کھڑا رہ سکتا ہے اور رنز بنا سکتا ہے جو جارحانہ انداز میں کھیلے ۔ میں نے اپنے کیریئر میں ریورس سوئنگ زیادہ نہیں کھیلی ہے ۔ یہ اچھا ہواکہ میں ایک دن پہلے اظہر سرکے پاس گیا۔ میری خواہش تھی کہ میں ان سے کرکٹ پر تفصیل سے بات کروں۔ میں ان سے ان کے دفتر میں ملا۔ انہوں نے مجھے بتایا کہ یہاں گیند جلدی ریورس ہوتی ہے ۔انہوں نے مجھے سمجھایا کہ اسے کیسے کھیلنا ہے اور اِن سوئنگ کے لیے کہاں کھڑا ہونا ہے ۔ لیگ اسٹمپ پر انہوں نے مجھے بہت سی باتیں بتائیں۔ وہ کھڑے ہو کر مختلف شاٹس کھیلنے کا طریقہ بھی سمجھانے لگے ۔ ہم نے تقریباً دوگھنٹے ساتھ گزارے ۔ میں ان سے پہلے بھی ملا تھا، لیکن اس طرح کبھی نہیں۔ سرفراز نے یہ بھی بتایا کہ انہوں نے اظہر کی بیٹنگ کے ویڈیوز دیکھ کر بہت کچھ سیکھا۔ جب میں چھوٹا تھا تو میرے ابو مجھے ان کی بیٹنگ کے ویڈیوز دکھاتے تھے ۔اب بھی وہ مجھے اظہر کے ویڈیوز دکھاتے ہیں کہ فلک شاٹ کیسے کھیلناہے ۔
