منامہ۔ 12 مئی (ایجنسیز): بحرین کے بادشاہ حماد بن عیسیٰ الخلیفہ نے سعودی عرب کے وزیر تعلیم یوسف بن عبداللہ البنیان سے قصر السخیر میں ملاقات کی۔ یہ ملاقات شاہ عبداللہ بن عبدالعزیز میڈیکل سٹی کی تکمیل کے معاہدے پر دستخط کے موقع پر ہوئی۔یہ منصوبہ عرب گلف یونیورسٹی کے تحت مکمل کیا جا رہا ہے اور یہ دونوں ممالک کے درمیان طبی تعلیم اور صحت کے شعبے میں ایک بڑی شراکت داری کی علامت ہے، جیسا کہ سعودی پریس ایجنسی ) نے رپورٹ کیا ہے۔ملاقات کے دوران، یوسف البنیان نے سعودی فرمانروا شاہ سلمان اور ولیعہد محمد بن سلمان کی جانب سے خیرسگالی کے پیغامات پہنچائے اور بحرین کی مسلسل ترقی کے لیے نیک خواہشات کا اظہار کیا۔انہوں نے اس بات پر بھی زور دیا کہ سعودی عرب بحرین کے ساتھ اپنے دیرینہ تعلقات کو خاص طور پر تعلیمی شعبے میں مزید مضبوط بنانے کو بہت اہمیت دیتا ہے۔بادشاہ حماد نے سعودی وزیر تعلیم کا خیرمقدم کیا اور نیک تمناؤں کے بدلے نیک خواہشات کا اظہار کیا۔ انہوں نے دونوں ممالک کے درمیان مضبوط تعلقات کی قدر دانی کرتے ہوئے کہا کہ مشترکہ منصوبوں، خاص طور پر شاہ عبداللہ میڈیکل سٹی کی پیش رفت، دونوں ملکوں کے درمیان گہرے تعاون کا مظہر ہے۔
