جدہ۔27 ۔ جون: عید الاضحی کی خوشیوں کے بیچ سعودی عرب کے الخبر میں ایک حیدرآبادی خاندان غم میںڈوب گیا کیونکہ اس خاندان نے پیر کی رات اپنے اُس ایک بچے کو بھی کھو دیا جو 13 جون کی شام پیش آئے خوفناک سڑک حادثے میں شدید زخمی ہو گیا تھا۔وہ ہاسپٹل میں زندگی کی جنگ لڑ رہا تھا۔ 14 سالہ محمد عمار اظہر دمام کے انڈین انٹرنیشنل اسکول میں آٹھویں جماعت کا طالب علم تھا ۔ان کے بھائی نویں جماعت کے ابراہیم اظہر اور گیارہویں جماعت کا ان کا مشترکہ دوست حسن ریاض اسی روز موقع پر ہی جاں بحق ہو گئے تھے۔ تینوں ایک کار چلا رہے تھے، حالانکہ یہ شہر کی حدود میں معمول کی رفتار تھی اور اس نے کسی دوسری کار یا سرکاری املاک کو نقصان نہیں پہنچایا لیکن اس سانحہ نے تینوں نوجوانوں کی جان لے لی۔مہلوک کے والد محمد اظہر دمام کی ایک معروف کمپنی میں آئی ٹی منیجرہیںاور حیدرآباد کے حسینی عالم کے ساکن ہیں۔ وہ اپنی اہلیہ، ایک بیٹی اور دو بیٹوں کے ساتھ الخبر میںمقیم ہیں ۔اس خوفناک حادثے نے ان کے دونوں بیٹوں کی جان لے لی۔اگرچہ یہ عید الاضحی کی تعطیلات ہیں لیکن معروف ہندوستانی سماجی کارکن ناس ووکم نے تمام متعلقہ حکام کے ساتھ قانونی رسمی کارروائیوں کی تکمیل میں اہم رول ادا کیا اور توقع ہے کہ نماز جنازہ 27 جون بروز منگل الخبر کی کنگ فہد مسجد میں بعد نماز عصر ادا کی گئی اور تدفین عمل میں آئی۔
