بیروت ۔ لبنان کے وزیر اطلاعات جارج قرداحی نے سعودی عرب اور خلیجی ممالک کی جانب سے تنقید کے بعد اپنے عہدے سے استعفیٰ دینے کا اعلان کر دیا۔ جارج قرداحی نے اپنے استعفیٰ کا اعلان بیروت میں ایک پریس کانفرنس کے دوران کیا۔ ان کا کہنا تھا کہ وہ استعفیٰ کے ذریعہ فرانسیسی صدر ایمانیول میکرون کے دورہ سعودی عرب کے دوران لبنان۔سعودی سفارتی جنگ کو ختم کرنے کی راہ ہموار کرنا چاہتے ہیں۔ ان کا مزید کہنا تھا کہ ان کے استعفیٰ کا فیصلہ لبنانی وزیر اعظم نجیب میکاتی اور فرانسیسی صدرمیکرون کے درمیان ہونے والے مذاکرات میں کیا گیا۔ یاد رہے کہ قرداحی نے یمن میں جاری جنگ میں سعودی عرب کو تنقید کا نشانہ بنایا تھا ، جس کے بعد لبنان کے نمایندے کو ملک سے بے دخل کرتے ہوئے سعودی عرب نے اپنا سفیر واپس بلا لیا تھا۔
