ریاض: سعودی عرب میں شاہی دفتر کے اعلان کے مطابق ڈاکٹر مطلب النفیسہ انتقال کرگئے ہیں۔ نماز جنازہ جمعہ کو بعد نماز عصر دارالحکومت ریاض کی شاہ خالد مسجد میں ادا کی گئی۔مطلب النفیسہ 1937 میں القصیم صوبہ میں پیدا ہوئے۔ سعودی کابینہ میں ماہرین کی کمیٹی کے سربراہ محمد العجاجی نے ایک ٹی وی انٹرویو میں کہا تھا کہ النفیسہ سعودی عرب کے پہلے قانون دان تھے۔ڈاکٹر مطلب النفیسہ نے 1962 میں قاہرہ یونیورسٹی سے قانون میں گریجویشن مکمل کی۔ اس کے بعد انھیں اسکالر شپ پر امریکہ بھیج دیا گیا جہاں انھوں نے ہارورڈ یونیورسٹی سے قانون میں ماسٹرز اور ڈاکٹریٹ کی ڈگری حاصل کی۔ وہ 1971 سے 1975 تک امریکہ میں زیر تعلیم رہے۔ڈاکٹر مطلب کو سعودی کابینہ میں قانونی مشیر مقرر کیا گیا۔ انھوں نے کئی سرکاری عہدوں پر کام کیا جن میں بطور وزیر مملکت اور کابینہ کا رکن شامل ہے۔
