ریاض ۔ 14 اکٹوبر (ایجنسیز) سعودی عرب نے پیر کو ریاض میں دو روزہ دوسری انٹرپول فیوچر آف پولیسنگ کانگریس 2025 کی میزبانی کی جس میں سکیورٹی چیلنجز اور تبدیلی پر توجہ مرکوز کی گئی۔نائف عرب یونیورسٹی فار سکیورٹی سائنسز (این اے یو ایس ایس) میں انٹرنیشنل کریمنل پولیس آرگنائزیشن کے تعاون سے منعقدہ کانفرنس میں 40 ممالک اور مختلف علاقائی اور بین الاقوامی سکیورٹی اداروں کے وفود شریک ہیں۔ اس تقریب میں پولیسنگ کے مستقبل، تکنیکی پیش رفت اور اس بات پر توجہ مرکوز کی گئی کہ قانون نافذ کرنے والے ادارے نئے چیلنجز سے کیسے نمٹ سکتے ہیں۔اس تقریب میں اعلیٰ سعودی حکام نے شرکت کی جن میں قائم مقام نائب وزیرِ داخلہ شہزادہ عبدالعزیز بن محمد بن ایاف شامل تھے۔این اے یو ایس ایس کے صدر ڈاکٹر عبدالمجید البانیان نے صلاحیتوں میں سرمایہ کاری کرنے اور مختلف پروگراموں اور تقریبات کے ذریعہ سکیورٹی سے متعلق فیصلہ سازی بہتر کرنے کیلئے یونیورسٹی کے عزم کو اجاگر کیا۔سعودی پریس ایجنسی کے مطابق انہوں نے وزیرِ داخلہ شہزادہ عبدالعزیز بن سعود بن نائف کی حمایت اور انٹرپول کے تعاون پر شکریہ ادا کیا۔ انٹرپول کے صدر میجر جنرل احمد الرئیسی نے کہا، سکیورٹی کا شعبہ عالمی تبدیلیوں سے متاثر ہوا ہے جس کیلئے تمام دنیا کی پولیس فورسز کی جدید تکنیکی تیاری اور تزویری دور اندیشی کی ضرورت ہے۔ انہوں نے مزید کہا کہ جدید ٹیکنالوجیز نے جرائم کی حرکیات تبدیل کر دی ہیں جس سے مجرموں کیلئے مصنوعی ذہانت اور ڈیجیٹل سسٹم کا استعمال کرنا ممکن ہو گیا ہے اور اس طرح وہ قانون نافذ کرنے والے روایتی طریقوں کو ناکام بنا سکتے ہیں۔
