بالی ووڈ اداکار سعودی عرب میں فلم شوٹنگ کے خواہشمند
ریاض : بالی ووڈ اسٹار سلمان خان جنہوں نے حال ہی میں سعودی عرب کا دورہ کیا ہے انہیں سعودی حکام کی جانب سے خصوصی اعزاز سے نوازا گیا ۔ ہے ۔ سلمان خان جمعرات کو دبنگ سیزن کا آغاز کرنے ریاض پہنچے تو سعودی حکام کی جانب سے ان کا زبردست استقبال کیا گیا ۔ سعودی حکام نے سلمان خان کے خصوصی اعزاز کے طور پر ان کے ہاتھوں کے پرنٹس کو ریاض میں وال آف فیم شامل کردیا ہے ۔ سوشیل میڈیا پر ریاض بولیفارد کی جانب سے تصاویر اور ویڈیوز جاری کی گئی ہیں ۔ ان تصاویر میں دیکھا جاسکتا ہے کہ سلمان خان کا شو دیکھنے کے لئے اتنے لوگ موجود ہیں کہ تل دھرنے کی جگہ نظر نہیں آرہی ۔ اسی طرح سوشیل میڈیا پر شیئر ویڈیو میں یہ بھی دیکھا جاسکتا ہے کہ سلمان خان اور دیگر اسٹارز کی پرفارمنس پر لوگ جھوم اٹھے خیال رہے کہ سعودی عرب کے دارالحکومت ریاض میں سیزن 2021ء کا انعقاد کیا گیا ہے جس کے افتتاحی کنسرٹ میں امریکی ریپرپٹبل نے پرفارم کیا ۔ آرٹس اینڈ کلچر فیسٹول آئندہ تین ماہ تک جاری رہے گا ۔ اس کا اہتمام جنرل انٹرٹیمنٹ اتھاریٹی نے کروایا ہے اور اس کے تحت ریاض بھر میں 7,500 تقریبات کا انعقاد کروایا جائے گا جس میں موسیقی ، کھیل ، فنون لطیفہ سے لے کر کھانے تک شامل ہیں ۔ اداکار سلمان خان کے دبنگ ری لوذڈ شو کا ریاض بولیفارد میں انعقاد بھی اسی فیسٹول کے تحت ہوا ۔ اس شو میں سلمان خان کے ہمراہ شلپا شیٹی ، پربھو دیوا ، ایوش شرما ، سائی مکھرجی اور دیگر بھی موجود تھے ۔ یہ میگا ایونٹ ولی عہد شہزادہ محمد بن سلمان کے ویژن 2030 ء کاحصہ ہے ۔ سلمان خان نے سعودی عرب میں اپنی فلموں کی شوٹنگ کرنے کی خواہش کا اظہار کردیا ہے ۔ سلمان خان نے اپنے دورہ سعودی عرب میں ایک پریس کانفرنس کرتے ہوئے سعودیہ میں پرفارم کرنے کا موقع ملنے پر حکام کا شکریہ ادا کیا ہے ۔ اور وہاں پر اپنی فلموں کی شوٹنگ کرنے کا خواہش کا اظہار کیا ہے ۔ انہوں نے کہا کہ ہم اپنی طرف سے وعدہ کرتے ہیں کہ ہم یہاں زیادہ کثرت سے آئیں گے ۔ ہم آپ کو انٹرٹین کرنے کی پوری کوشش کریں گے ۔ ہمیں یہاں ہماری فلمیں ملیں گی ۔ ہم یہاں اپنے کنسرٹ کریں گے ۔ ہم آپ کو اچھی اور معیاری انٹرٹینمنٹ فراہم کریں گے ۔ اداکار کا کہنا ہے کہ وہ چند مہینے پہلے یہاں دمام آئے تھے ۔ تب انہوں نے سعودیہ میں تبدیلی دیکھی اور وہ ان چند مہینوں میں ایک بار پھر زبردست تبدیلی دیکھ رہے ہیں ۔ انہوں نے مزید کہا کہ حقیقت یہ ہے کہ ہم یہاں پہلی بار پرفارم کررہے ہیں ۔ یہ ایک بڑی تبدیلی ہے ۔ انہوں نے کہا کہ وہ تمام چہروں پر تبدیلی اور مسکراہٹ دیکھ رہے ہیں اور آپ کے چہرے پر مسکراہٹ سے بہتر کیا ہوگا ۔ سلمان خان نے سعودی عرب کے لوگوں سے وعدہ کیا کہ وہ بہت جلد ان کے لئے مزید انٹرٹینمنٹ اور بہت ہی فلموں کے ساتھ سعودیہ آئیں گے ۔ سعودی عرب میں اپنی فلموں کی شوٹنگ اور باہمی تعاون کے بارے میں سلمان خان نے کہا کہ وہ کوشش کریں گے کہ کچھ فلموں کی شوٹنگ سعودیہ میں کرسکیں کیونکہ یہاں بہت خوبصورت لوکیشنز ہیں ۔