نئی دہلی : ہندوستان میں سمندری طوفان کا الرٹ کیا گیا ہے جس سے سات ریاستوں میں نقصان ہو سکتا ہے۔اخبار ہندوستان ٹائمز کے مطابق محکمہ موسمیات کا کہنا ہے کہ ’بحیرہ عرب میں بننے والے طوفان میں ہفتہ کی صبح تیزی دیکھی گئی ہے جس میں مزید اضافہ بھی ہو رہا ہے۔‘حکام کے مطابق ’بائپر جوائے نامی طوفان کے باعث انڈیا کے جنوبی علاقوں میں شدید بارش بھی ہو گی جس کا سلسلہ چار روز تک جاری رہ سکتا ہے۔‘محکمہ موسمیات کا کہنا ہے کہ اس وقت طوفان گوا شہر کے مغرب میں 690 کلومیٹر کے فاصلے پر موجود ہے اور مہاراشٹر کے علاوہ ممبئی کے قریبی اضلاع کے لیے انتباہ جاری کیا گیا ہے۔’اگلے 48 گھنٹے کے دوران ممبئی اور مہاراشٹر میں بارش ہو گی۔ ممبئی میں بارش کی شدت کم ہو گی تاہم اس کے قریبی اضلاع میں شدید بارش ہو سکتی ہے۔‘کیرالہ ریاست کے لیے ییلو الرٹ جاری کیا گیا ہے جس کا مطلب یہ ہے اس کے مختلف شہروں میں گرج چمک کے ساتھ بارش ہو گی جبکہ تیز ہوائیں بھی چلیں گی۔حکام کے مطابق سمندر میں بننے والا طوفان ہندوستان کی طرف آنے والی ہواؤں میں تیزی لا رہا رہے جس سے ہوا میں نمی بڑھ رہی ہے اور بادل بھی آ رہے ہیں۔اس وقت کیرالا میں شدید گرمی پڑ رہی ہے اس لیے امکان یہی ہے کہ آج بارش کا سلسلہ شروع ہو گا۔وارننگ جاری ہونے کے بعد گجرات کے مشہور سیاحتی مقام کی ٹیتھل بیچ کو 14 جون تک بند کر دیا گیا ہے۔
