کولمبو۔27 اپریل (سیاست ڈاٹ کام )سری لنکا کرکٹ ٹیم کے سابق کپتان کمار سنگا کارا نے پاکستان کی 8 سالہ سامیعہ افسر کی صلاحیتوں کی تعریف کردی۔میڈیا رپورٹس کے مطابق گزشتہ دنوں سامیعہ افسر کی بیٹنگ کرنے کی ویڈیو سوشل میڈیا پر خوب وائرل ہوئی، ویڈیو میں اْن کے بیٹنگ کرنے کے اسٹائل کو سری لنکا کے سابق کپتان کمار سنگاکارا کے ساتھ مشابہت دی گئی۔سنگاکارا بھی سامیعہ افسر کی ویڈیو دیکھ کر اْن کی تعریف کیے بنا نہ رہ سکے۔کمار سنگاکارا نے ٹوئٹر پر اپنے پیغام میں کہا کہ ینگ ٹیلنٹ کی تکنیک مجھ سے بہت بہتر ہے۔ کرکٹ میں ایسا ٹیلنٹ دیکھنا بہت اچھی چیز ہے۔انہوں نے کہا کہ میں سمجھتا ہوں کہ بیٹنگ کا مستقبل محفوظ ہاتھوں میں ہے۔ اس عمر میں ایسی صلاحیت دیکھ کر بہت متاثر ہوا ہوں۔سامیعہ افسر پہلی مرتبہ 2018 میں لاہور قلندرز کے پلئیر ڈویلپمنٹ پروگرام کے ٹرائیلز کے دوران سامنے آئیں، وہ اپنے والد کے ہمراہ ٹرائیلز دینے پہنچی تھیں۔
