یواے ای : 13 جولائی (ایجنسیز)تاجکستان سے تعلق رکھنے والے دنیا کے سب سے چھوٹے قد کے نامور گلوکار اور سوشل میڈیا اسٹار عبدو روزق کو دبئی ائیرپورٹ پر گرفتار کرلیا گیا۔انڈین رئیلیٹی شو بگ باس کے 16 ویں سیزن کے امیدوار مقبول تاجک اسٹار کی پی آر کمپنی نے تصدیق کی ہیکہ عبدو روزق کو ہفتے کی صبح یورپی ملک مونٹی نیگرو سے واپسی پر دبئی ائیرپورٹ پر گرفتار کیا گیا ہے۔یہ واضح نہیں ہوسکا کہ عبدو روزق کے خلاف کیا شکایات تھیں تاہم تاجک اسٹار کی ٹیم کے ایک نمائندے نے عرب میڈیا کو بتایا کہ ہمیں معلوم ہوا ہیکہ عبدو روزق کو چوری کے الزام میں گرفتار کیا گیا ہے۔ اس حوالے سے انہوں نے مزید کوئی تفصیل دینے سے انکار کیا جب کہ دبئی کے حکام کی جانب سے بھی تاحال کوئی بیان سامنے نہیں آیا ہے۔واضح رہیکہ تاجکستان سے تعلق رکھنے والے گلوکار اور سوشل میڈیا اسٹار عبدو روزق کی عمر 21 برس ہے۔ ان کا قد صرف 100 سینٹی میٹر ہے جس کی وجہ سے انہیں دنیا کا سب سے چھوٹے قدکا گلوکار بھی کہا جاتا ہے۔عبدو روزق نے بھارتی رئیلیٹی شو بگ باس کے 16 ویں سیزن میں بھی حصہ لیا تھا جس کے باعث وہ ہندوستان سمیت پاکستان میں بھی مقبول ہوگئے۔عبدو روزق گزشتہ کچھ سالوں سے دبئی میں مقیم ہیں اور ان کے پاس دبئی کا گولڈن ویزا ہے۔
