نئی دہلی۔ کانگریس کی صدر سونیا گاندھی کا کورونا ٹیسٹ دوبارہ مثبت آگیا ہے۔ سونیا گاندھی کا کورونا ٹسٹ دوبارہ مثبت آنے کے حوالے سے کانگریس کی ایم پی اورکمیونیکیشن انچارج جے رام رمیش نے مائیکروبلاگنگ ویب سائٹ ٹوئٹر پر اطلاع دی ہے۔ انہوں نے اپنے ٹوئٹ میں لکھا کہ آج کانگریس صدر سونیا گاندھی کا کورونا ٹسٹ مثبت آیا ہے۔ انہوں نے مزید لکھا کہ وہ حکومت کے بتائے ہوئے کورونا پروٹوکولز کے مطابق آئسولیشن میں ہی رہیں گی۔ دوسری جانب کانگریس کے آفیشل ٹوئٹر اکاؤنٹ پر پارٹی کی قائد سونیا گاندھی کا کورونا ٹسٹ مثبت آنے پر پارٹی کی جانب سے ایک خصوصی پیغام شیئر کیا گیا ہے۔ اس ٹوئٹر پیغام میں پارٹی کی جانب سے اپنی قائد کی جلد صحتیابی کے لیے دعا کی گئی ہے۔ خیال رہے کہ سونیا گاندھی جون میں بھی کورونا وائرس کا شکار ہوئی تھیں اور اس وقت وہ کورونا سے متعلق مسائل کی وجہ سے دہلی کے سر گنگا رام اسپتال میں بھی داخل رہی تھیں۔ سونیا گاندھی نے اسی لیے منی لانڈرنگ کیس میں پوچھ گچھ کے لیے انفورسمنٹ ڈائریکٹوریٹ (ای ڈی) سے مزید وقت بھی مانگا تھا۔
