نئی دیلی، 5 دسمبر (سیاست ڈاٹ کام) غیرسرکاری تنظیم انہداور کاروان محبت نے ایودھیا مقدمہ میں سپریم کورٹ کے فیصلے اور آئینی اخلاقیات کے موضوع پر بحث کے لئے 6 دسمبر 2019 کو یہاں کانسٹیوشن کلب کے ڈپٹی چیرمین ہال میں دوپہر دو بجے سے شام 6بجے تک ایک پبلک میٹنگ کا اہتمام کیا ہے ۔ یہاں انہد کی طرف سے جاری بیان میں کہا گیا ہے کہ اس فیصلے نے انصاف ،مساوات اور آئینی اقدار پر یقین رکھنے والے تمام لوگوں کو گہری تشویش میں مبتلا کردیا ہے ۔ بیان کے مطابق اس میٹنگ میں سرکردہ صحافی اور سماجی کارکن اپنے خیالات کا اظہار کریں گے اور آئندہ کے لائحہ عمل پر غور کریں گے ۔ مقررین میں عارفہ خانم شیروانی ،بھاشا سنگھ، فرح نقوی، ہرش مندھر ، ہرتوش سنگھ بل ، شبنم ہاشمی، سیدہ حمید، ایس وائی قریشی ، ارملیش اور گوہر رضا شامل ہیں۔
