انتخابات میں حصہ لینے کیلئے رکھیں شرائط
کھٹمنڈو۔19؍اکتوبر( ایجنسیز ) نیپال کے جنریشن زیڈ گروپ نے کل سیاسی پارٹی قائم کرنے کا اعلان کیا۔ اسی کے ساتھ انہوں نے اگلے سال ہونے والے عام انتخابات میں شرکت کیلئے کچھ شرائط بھی رکھیں۔ نیپال میں 5 مارچ 2026 کوانتخابات ہونے والے ہیں۔نوجوانوں کی زیرقیادت گروپ نے گذشتہ ماہ بدعنوانی کے خلاف مظاہروں اور سوشل میڈیا سائٹس پر حکومتی پابندی کے خلاف تحریک کی قیادت کی جس کے نتیجے میں کے پی شرما اولی کی قیادت والی حکومت کو معزول کر دیا گیا۔ حالیہ جنریشن زیڈ تحریک کے رہنماؤں میں سے ایک معراج ڈھنگانہ کی قیادت میں گروپ نے ایک پریس کانفرنس میں اپنا ایجنڈا پیش کیا۔انہوں نے زور دے کر کہا کہ اگرچہ وہ جنریشن زیڈ نوجوانوں کو اکٹھا کرنے کیلئے ایک سیاسی جماعت بنانے پر غور کر رہے ہیں لیکن وہ اس وقت تک الیکشن نہیں لڑیں گے جب تک کہ ان کے مطالبات پر توجہ نہیں دی جاتی۔ یہ گروپ بنیادی طور پر دو اہم ایجنڈوں کی وکالت کرتا رہا ہے جس میں سے ایک براہ راست منتخب ایگزیکٹو سسٹم اور دوسرا بیرون ملک مقیم نیپالی شہریوں کیلئے ووٹنگ کے حقوق کا مطالبہ شامل ہے۔ڈھنگانہ کے مطابق ان کے گروپ نے فیصلہ کیا ہے کہ جنریشن زیڈ تحریک سے وابستہ نوجوانوں کو متحد کرنے کے لیے سیاسی پارٹی کی تشکیل ضروری ہے۔ اپنے ایجنڈے کا انکشاف کرتے ہوئے ڈھنگانہ نے بدعنوانی پر قابو پانے کے لیے شہریوں کی قیادت میں جانچ کمیٹی کی تشکیل اور اقتصادی تبدیلی پر واضح پالیسی اپنانے پر زور دیا۔انہوں نے قوم کی تعمیر کے کام میں تمام فریقوں سے اجتماعی عزم اور تعاون کا مطالبہ کیا۔ انہوں نے مزید کہا کہ وہ فی الحال نئی پارٹی کے لیے مناسب نام کے لیے تجاویز جمع کر رہے ہیں۔انہوں نے عبوری حکومت پر زور دیا کہ وہ فوری طور پر بند صنعتوں کو دوبارہ کھولنے اور نئی ملازمتیں پیدا کرنے کا عمل شروع کرے۔ انہوں نے سیاحت کے شعبے کو ترقی دینے اور فروغ دینے کی ضرورت پر بھی زور دیا۔ انتخابات کی تاریخ کا اعلان صدر رام چندر پاڈیل نے 12 ستمبر کو سابق چیف جسٹس سشیلا کارکی کی قیادت میں عبوری حکومت تشکیل دیتے ہوئے کیا تھا۔