جگدل پور : چھتیس گڑھ کے جگدل پور ضلع کے بھجی تھانہ علاقے کے بھنڈارپدر میں جمعہ کی صبح ہوئے انکاؤنٹر میں سیکوریٹی فورسز نے نکسلیوں کی ’گوریلا جنگی حکمت عملی‘ اپناتے ہوئے ماؤنوازوں کو شکست دی۔ اس تصادم میں سیکوریٹی فورسز کی ایک مشترکہ پارٹی نے 10 بڑے کیڈر نکسلائیٹس کو مار گرایا ہے ۔ اس انکاؤنٹر میں نکسلیوں کی ’گوریلا پالیسی‘ ان پر حاوی نظر آئی۔ جس طرح سے اب تک نکسلائیٹ ’گوریلا جنگی حکمت عملی‘ کے تحت فوجیوں کو گھیر کر ان پر حملہ کرتے تھے ۔ سپاہیوں نے اس بار بھی یہی حکمت عملی اپناتے ہوئے نکسلیوں کو گھیر کر مار ڈالا۔ اس مقابلے کے بعد فوجیوں کے حوصلے بلند ہیں۔ جیسے ہی فوجی نکسلیوں کی لاشوں اور ہتھیاروں کے ساتھ کیمپ میں واپس آئے ، انہوں نے بھرپور طریقے سے جشن منایا۔ اسی دوران ڈپٹی انسپکٹر جنرل آف پولیس (ڈی آئی جی) کملوچن کشیپ نے بھی جوانوں کو میٹھا کھلایا۔ بتایا جاتا ہے کہ اس آپریشن میں 500 سے زائد فوجی شامل تھے ۔ پولس پارٹی تقریباً 60 کلومیٹر پیدل چلنے کے بعد بھنڈرپدر پہاڑی پر پہنچی اور پہاڑی سے ہی نکسلیوں کو نشانہ بنایا۔ ڈی آئی جی کشیپ نے فوجیوں کے لیے 10 لاکھ روپے کے انعام کا اعلان کیا ہے ۔
