مذہب اور ذات پات سے قطعِ نظر غریب بچوں کو کھانا فراہم کرنا ، خواتین کو ہنر مند بنانا ، بچوں کیلئے کوچنگ سنٹر اہم سرگرمیاں
نئی دہلی: شاہین باغ کی خواتین نے کچھ نیا کرنے کے عزم کے ساتھ خواتین پر مبنی ایک تنظیم اتولیہ شاہین باغ قائم کی ہے جس کا مقصد مذہب اورذات پات سے اوپر اٹھ کر دو سو غریب بچوں کو کھانا فراہم کرنے کے ساتھ خواتین کو بااختیار بنانا، ان کو ہنر سکھانااور بچوں کو تعلیم دینے کے لئے کوچنگ سنٹر کا قیام ہے۔ یہ بات انہوں نے شاہین باغ رسوئی کے افتتاح کے موقع پر کہی ہے ۔فی الحال اس گروپ میں 35خواتین شامل ہیں اور اس میں مزید خواتین کو شامل کیا جائے گا اور اسے بڑا گروپ بنایا جائے گا جس کے ذریعہ سماجی خدمات کو انجام دیا جاسکے ۔ فی الحال شاہین باغ رسوئی کی شروعات کی گئی ہے جس میں خواتین اپنے گھروں سے کھانا بناکر لائی تھیں اوراس کے ذریعہ کھانا بنانے کے ہنر کو متعارف کرانا ہے تاکہ شاہین باغ رسوئی کے توسط سے کاروباری شکل دی جاسکے ۔ اس گروپ سے وابستہ امینہ شیروانی نے کہاکہ مسلم خواتین کے بارے میں یہ بات کہی جاتی ہے کہ وہ گھروں سے نہیں نکلتیں یا وہ کچھ نہیں کرسکتیں۔ اس تصور کو توڑنے کے لئے ہم لوگوں نے اس گروپ کی تشکیل کرکے سماجی کاموں اور خدمت خلق کے میدان میں قدم رکھنے کا فیصلہ کیا ہے۔ انہوں نے کہاکہ اس گروپ کے ذریعہ ہم دو سو غریب بچوں کو مقوی اور صحت مند کھانا فراہم کریں گے اور اس کے لئے سروے کرکے غریب بچوں کی نشان دہی کریں گے ۔ انہوں نے کہاکہ اس کے ساتھ ہمارا مقصد خواتین کو بااختیار اور خود کفیل بنانا بھی ہے تاکہ خواتین اپنے پیروں پر کھڑی ہوسکیں۔ اس کے لئے سلائی کڑھائی سنٹر قائم کیا جائے گا ۔ دیگر ہنر بھی سکھائے جائیں گے ۔ انہوں نے کہاکہ اس کے علاوہ بچوں کی تعلیم کے لئے کوچنگ سنٹر بھی چلائے جائیں گے جس میں بچوں کو تمام مضامین پڑھائے جائیں گے اور خاص طور پر غریب بچوں پر توجہ مرکوز کی جائے گی۔ انہوں نے کہاکہ ہنرکی ٹریننگ کے ذریعہ خواتین کو روزگار سے جوڑنا ہے تاکہ وہ خود کفیل بن سکیں۔ اس گروپ کی اہم رکن شبینہ خاں نے بتایا کہ اس گروپ کے ذریعہ مسلم خواتین میں تبدیلی لائی جائے گی اور ان کی سوچ بھی بدلی جائے گی تاکہ وہ زندگی کے ہر شعبے میں بڑھ چڑھ کر حصہ لے سکیں۔ انہوں نے کہاکہ آج بھی مسلم بچیاں تعلیم حاصل کرنے سے محروم ہیں اور ان کے پاس وسائل نہیں ہیں یا دیگر پریشانیاں ہیں۔ اس پر ہماری توجہ خاص طور پر رہے گی۔ اس کے ذریعہ خواتین کے مسائل پر توجہ دی جائے گی اور مشاورت کے ذریعہ ان کے مسائل کو حل کرنے کی کوشش کی جائے گی۔انہوں نے کہاکہ ہم لوگوں نے پوری منصوبہ بندی کی ہے کہ شاہین باغ رسوئی کی آمدنی اوراہل خیر کی مدد سے ہم اپنے منصوبے کو پورا کریں گے ۔ اس میں صحافی روچیرا گپتا اور تنظیم اِمپاور ہماری مدد کررہی ہیں۔ اتولیہ شاہین باغ کی رکن کنیز فاطمہ نے کوچنگ سنٹر کی وضاحت کرتے ہوئے کہاکہ اس میں کوئی مسئلہ نہیں ہوگا ۔ ہمارے ماتحت دو سو کوچنگ سنٹر چل رہے ہیں اور یہاں بھی کوچنگ سنٹر چلائیں گے تاکہ بچوں کے ترک تعلیم پر قابو پایا جاسکے ۔ اتولیہ شاہین باغ کے شاہین باغ رسوئی کے افتتاح کے موقع پر گروپ سے وابستہ رفعت، شہلا، تہمینہ، نصرت آراء اور اِمپاور کی نمائندہ خواتین موجود تھیں۔یہ تمام خواتین سی اے اے ، این آر سی اور این پی آر کے خلاف شاہین باغ احتجاج میں شامل تھیں اور اب ان لوگوں نے سماجی اصلاحات کے ساتھ خواتین کو خودکفیل بنانے کا بیڑہ اٹھایا ہے ۔
