لارڈز ۔6 جولائی (سیاست ڈاٹ کام ) نوجوان پاکستانی فاسٹ بولر شاہین شاہ آفریدی نے ورلڈ کپ میں نئی تاریخ رقم کردی اور پاکستان کی جانب سے بہترین بولنگ کا ریکارڈ بنانے کے ساتھ نیا عالمی ریکارڈ بھی اپنے نام کر لیا۔ بنگلہ دیش کے خلاف لارڈز کے تاریخی میدان پر کھیلے گئے ورلڈ کپ میچ میں پاکستان نے حریف ٹیم کو فتح کے لیے 316رنز کا ہدف دیا۔ہدف کے تعاقب میں شکیب الحسن کی ایک اور نصف سنچری کے باوجود بنگلہ دیش کی پوری ٹیم 221 رنز پر ڈھیر ہوکر میچ میں 94 رنزکی بدترین شکست سے دوچار ہوئی۔ اس میچ میں شاہین شاہ آفریدی نے عمدہ بولنگ کا مظاہرہ کرتے ہوئے 9.1 اوورزمیں 35 رنزکے عوض 6 وکٹیں حاصل کیں اور مین آف دی میچ کا اعزاز حاصل کر لیا۔ اس کارکردگی کی بدولت وہ لارڈز کے تاریخی میدان کے آنرز بورڈ پر بھی اپنا نام درج کروانے میں کامیاب رہے ۔ شاہین آفریدی نے اس عمدہ کارکردگی کی بدولت ورلڈکپ میں پاکستان کی جانب سے بہترین بولنگ کا ریکارڈ اپنے نام کر لیا جہاں ان سے قبل یہ ریکارڈ شاہد آفریدی کے پاس تھا جنہوں نے 2011 کے ورلڈکپ میں کینیا کے خلاف میچ میں 16رنزکے عوض 5 وکٹیں لی تھیں۔ شاہین پاکستان کی ونڈے کرکٹ کی تاریخ میں ایک اننگز میں بہترین بولنگ کرنے والے بائیں ہاتھ کے بولر بن گئے ہیں۔19 سالہ نوجوان پاکستانی فاسٹ بولر شاہین ورلڈ کپ کرکٹ کی تاریخ میں پانچ یا اس سے زائد وکٹیں لینے والے 20 سال سے کم عمر کے پہلے بولربن گئے ہیں۔ اس سے قبل انہوں نے نیوزی لینڈ کے خلاف میچ میں بھی ایک منفرد اعزاز حاصل کیا تھا جب وہ 4 وکٹیں لینے والے ورلڈکپ کی تاریخ کے پہلے 20 سال سے کم عمر بولر بنے ۔
