پٹنہ: مرکزی وزیر اور بی جے پی کے سینئر لیڈر گری راج سنگھ نے آج الزام لگایا کہ جے ڈی یو واحد پارٹی ہے جس کی آمدنی بہار میں شراب بندی قانون کے نفاذ کے بعد پانچ سال میں غیر معمولی اضافہ ہوا ہے ۔ چہارشنبہ کو یہاں نامہ نگاروں سے بات کرتے ہوئے سنگھ نے الزام لگایا کہ بہار میں شراب پر پابندی کے بعد ریاستی حکومت کو ملنے والے تمام محصولات شراب مافیا کو جاتے ہیں، جس کا استعمال جے ڈی یو کو چلانے کے لیے کیا جاتا ہے ۔ آج شراب بندی قانون ہٹے گا ، کل جے ڈی یو ختم ہو جائے گی۔ انہوں نے کہا ہے کہ شراب پر پابندی کے بعد جے ڈی یو کے عطیات میں غیر معمولی اضافہ ہوا ہے ۔ بی جے پی کے سینئر لیڈر سنگھ نے شراب بندی کے بعد پانچ سال میں جے ڈی یو کو ملنے والے عطیات کے اعداد و شمار بھی جاری کیے ہیں، جس میں انہوں نے پارٹی کو سال 2016-17سے 2020-21 تک کے عطیات کے بارے میں بتایا ہے ۔ انہوں نے کہا کہ کس طرح جے ڈی یو کا چندہ پانچ سالوں میں 359 لاکھ روپے سے بڑھ کر آج 6,531 لاکھ روپے ہو گیا ہے ۔ جہاں پارٹی کی آمدنی 2016-17 میں 359 لاکھ روپے تھی، وہیں سال 2020-21 میں یہ رقم بڑھ کر 6,531 ہو گئی۔ یہ تب ہے جب بہار میں کوئی بڑی صنعت نہیںلگی۔ صاف ظاہر ہے کہ شراب مافیا نے یہ چندہ جے ڈی یو کو دیا تاکہ شراب بندی کے نام کا ڈھونگ جاری رہے ۔
