کراچی۔6 اپریل (سیاست ڈاٹ کام) پاکستانی کرکٹ ٹیم کے سابق کپتان رمیز راجا نے دو سابق کپتانوں شعیب ملک اور محمد حفیظ کے بارے میں اپنے سابق موقف کو دہرایا ہے کہ دونوں کو باعزت انداز میں بین الاقوامی کرکٹ سے سبکدوشی اختیارکرنی چاہیے۔ میڈیا سے بات چیت میں مشہور مبصر نے کہا کہ میں کوشش کرتا ہوں کہ کسی بھی کھلاڑی کے انفرادی فعل پر بات نہ کروں۔ میرا دونوں سے میدان میں اکثر آمنا سامنا ہوتا ہے اس لئے میں کوشش کرتا ہوں کہ وہ میری کسی بات پر ردعمل نہ دیں ، ان کی خدمات انکار نہیں کیا جاسکتا لیکن اس موقع پر دونوں کو پاکستانی کرکٹ ٹیم کو خیر باد کہہ دینا چاہیے۔ رمیز راجا نے کہا کہ میں پی سی بی میں نہیں آناچاہتا۔ کبھی فرد واحد کی بات نہیں کرتا لیکن کرکٹرز کی سمت کا تعین درست ہونا چاہیے۔ سچ بات کر نے کا عادی ہوں، ایسے فیصلوں سے پاکستان کرکٹ کو فائدہ ہوسکتا ہے۔ واضح رہے کہ مصباح الحق نے کہا ہے کہ چونکہ ٹی ٹوئنٹی ورلڈ کپ میں ابھی کافی وقت ہے لہذا انہوں نے پچھلے چند میچوں میں متعدد ٹیموں کو آزمائے اور نئے کھلاڑیوں کو موقع دیا لیکن محمد حفیظ اور شعیب ملک کو سری لنکا کے خلاف نہ کھلانے کا مقصد قطعاً یہ نہیں تھا کہ انہیں ہمیشہ کے لئے نظراندازکردیاگیا ہے یا بورڈ ان کے خلاف تھا۔ یہ دونوں کھلاڑی ٹی ٹوئنٹی ورلڈ کپ کے منصوبے کا حصہ ہیں۔ اب ہمارے پاس زیادہ کھلاڑیوں کا پول ہے اور ہم بہتر کھلاڑیوں کے ساتھ ٹیم تشکیل دے سکتے ہیں۔
