پیانگ یانگ۔ شمالی کوریا نے جنوبی کوریا کے خلاف معلوماتی مہم چلانے کے تحت ایک کروڑ 20لاکھ ورقئے شائع کرائے ہیں۔شمالی کوریا کی سنٹرل نیوز ایجنسی (کے سی این اے ) نے پیر کو اپنی رپورٹ میں بتایا ہے کہ ان ورقیوں کو پھیلانے کے لئے 3000 مختلف قسم کے ہوائی غباروں سمیت خصوصی آلات تیار کئے جائیں گے اور ملک کا ایک پرنٹنگ ہاؤس اس کے علاوہ کئی ورقیوں کی اشاعت کی تیزی سے تیار ی کررہاہے ۔کے سی این اے نے اتوار کے روز شمالی کوریا کی ورکرز پارٹی کی مرکزی کمیٹی کے متحدہ محاذ کے ترجمان کے حوالے سے کہا ہے کہ شمالی کوریا جانتا ہے کہ ان ورقیوں کو تقسیم کرنے سے بین کوریائی سمجھوتے کی خلاف ورزی ہوگی لیکن یہ اس کے اپنے منصوبہ تبدیل کرنے کا وقت نہیں ہے ، جب دونوں ممالک کے تعلقات پہلے ہی بگڑ چکے ہوں۔اس سے قبل ہفتے کے روز کے سی این اے نے اطلاع دی تھی کہ شمالی کوریا نے جنوبی کوریا کے خلاف معلوماتی مہم چلانے کے لئے معلوماتی کتابچے تیار کرنا شروع کردیئے ہیں۔ انہوں نے کہا کہ تمام یونیورسٹیوں کے اسٹوڈنٹس ورقیے تقسیم کرنے کیلئے تیار ہیں۔ شمالی کوریا نے ایک بار پھر جنوبی کوریا پر صلح کرنے کے عمل کی حمایت کرنے میں ناکام ہونے کا الزام عائد کیا اور کہا کہ جنوبی کوریا کے عہدیداروں کو جلد ہی اس کا خمیازہ بھگتنا پڑے گا۔