وزیر محمد اظہر الدین کے علاوہ ہنمنت راؤ ، فہیم قریشی ، پرکاش گوڑ اور دیگر کی شرکت ، افتخار شریف کی میزبانی
حیدرآباد ۔ 28 ۔ نومبر : ( سیاست نیوز) : شمس آباد میں افتخار احمد شریف فرسٹ اوور سیز سٹیزن آف انڈیا نے تلنگانہ پردیش کانگریس کمیٹی صدر مہیش کمار گوڑ کی تہنیتی تقریب منعقد کی ۔ جس میں محمد اظہر الدین میناریٹی ویلفیر منسٹر ، ہنمنت راؤ سابق رکن پارلیمنٹ ، فہیم قریشی ٹمریز صدر ، پرکاش گوڑ رکن اسمبلی راجندر نگر ، راج ٹھاکر ، محمد اسد الدین ، راشد خان و دیگر نے شرکت کی ۔ مہیش کمار گوڑ نے اپنی مخاطبت میں کہا کہ چیف منسٹر ریونت ریڈی کی قیادت میں ریاست ترقی کی جانب آگے بڑھ رہی ہے ۔ انہوں نے کہا کہ کانگریس ایک سیکولر پارٹی ہے اور ہر طبقہ کی ترقی کے لیے کام کررہی ہے ۔ انہوں نے مسلمانوں کو مشورہ دیا کہ وہ اپنے بچوں کو بہتر سے بہتر تعلیم فراہم کریں ۔ مسلمان اکثر اپنے بچوں خاص کر لڑکیوں کو دسویں یا انٹر کے فوراً بعد تعلیم روک کر شادی کی تیاریاں شروع کردیتے ہیں ۔ مسلمانوں کو تعلیم پر خاص توجہ دینے کی ضرورت ہے ۔ تعلیم کے ذریعہ انسان زندگی میں ترقی کرسکتا ہے ۔ تعلیم کے ساتھ سیاست میں بھی مسلمانوں کو آگے آنا چاہئے ۔ مہیش کمار گوڑ نے کہا کہ ریاست میں کانگریس کی بڑھتی مقبولیت سے بی جے پی خوف زدہ ہوچکی ہے ۔ بی جے پی کو صرف کانگریس پر تنقید کرنے کے علاوہ کوئی کام باقی نہیں رہ گیا ہے ۔ پنچایت انتخابات پر بات کرتے ہوئے انہوں نے کہا کہ پنچایت انتخابات میں کانگریس پارٹی 90 فیصد سیٹوں پر کامیابی حاصل کرے گی ۔ بی جے پی کا مکمل صفایا ہوجائے گا ۔ عوام کانگریس کے دور میں خوشحال ہیں اور چیف منسٹر بھی ریاست کی ترقی کے لیے سنجیدہ ہے ۔ 2047 رائزنگ تلنگانہ کے لیے فلاحی کام انجام دے رہے ہیں ۔ افتخار احمد شریف نے کہا کہ مہیش کمار گوڑ ایک سیکولر لیڈر ہیں ان کی قیادت میں کانگریس کی مقبولیت میں اضافہ ہوا ہے وہ ہمیشہ سبھی طبقات کو ایک ساتھ لے کر چلنے پر یقین رکھتے ہیں ۔ محمد اظہر الدین کو وزارت میں شامل کرتے ہوئے مسلم دوستی کا بھی ثبوت دیا ہے ۔ چیف منسٹر کے ساتھ مل کر ٹی پی سی سی صدر ریاست کو ترقی یافتہ بنا رہے ہیں ۔ افتخار احمد شریف نے شمس آباد کو جی ایچ ایم سی میں ضم کرنے پر حکومت کا خیر مقدم کیا ۔ محمد اظہر الدین میناریٹی ویلفیر منسٹر نے کہا کہ کانگریس حکومت عوام کی فلاح و بہبود کے لیے کافی سنجیدہ ہے اور بہت جلد مسلمانوں کے مسائل کو حل کرنے کے اقدامات کرے گی ۔ محمد اظہر الدین نے کہا کہ افتخار احمد شریف دوہری شہریت کے حامل ہونے کے ساتھ وہ بہت ہی سادہ دل انسان ہے ۔ وہ بھی ہمیشہ سیاسی قائدین سے رابطہ رکھتے ہوئے ریاست کی ترقی خاص کر حیدرآبادی عوام کے لیے فلاحی اقدامات کے لیے پہل کرتے ہیں ۔ ہنمنت راؤ نے کہا کہ محمد اظہر الدین کی قیادت میں ریاست میں مسلمانوں کے مسائل کو حل کرنے کے اقدامات کئے جائیں گے ۔۔ ش
