سرینگر: جنوبی ضلع شوپیاں کے کٹپورہ میں پیر کی رات دیر گئے سکیورٹی فورسز اور جنگجوئوں کے درمیان ہوئے ایک مسلح تصادم میں دو جنگجو مارے گئے ۔ پولیس کے ایک ترجمان نے بتایا کہ شوپیاں کے کٹپورہ میں ہونے والے مسلح تصادم میں دو عدم شناخت جنگجو مارے گئے ۔ انہوں نے مزید کہا کہ علاقے میں آپریشن جاری ہے ۔سرکاری ذرائع نے تفصیلات فراہم کرتے ہوئے کہا کہ شوپیاں کے کٹپورہ میں جنگجوئوں کی موجودگی سے متعلق خفیہ اطلاع ملنے پر پولیس، فوج کی 34 راشٹریہ رائفلز اور سی آر پی ایف نے مذکورہ علاقے میں پیر کی شام دیر گئے کارڈن اینڈ سرچ آپریشن شروع کیا تھا۔ انہوں نے کہا کہ ایک مشتبہ جگہ کو محاصرے میں لینے کے دوران وہاں موجود جنگجوئوں نے فائرنگ کی جس کے بعد طرفین کے درمیان مسلح تصادم چھڑ گیا جس میں دو جنگجو مارے گئے ۔ وادی میں رواں برس اب تک مارے جانے والے جنگجوئوں کی تعداد بڑھ کر 193 ہوگئی ہے ۔ ان میں دو درجن غیر ملکی جنگجو شامل ہیں۔ اس کے علاوہ کم از کم 9 مقامی جنگجوئوں نے تصادم آرائیوں کے دوران خود سپردگی اختیار کی ہے ۔