چیف منسٹر ریونت ریڈی اور وزیر سری ہری مدعو، تلنگانہ پولٹری فیڈریشن کا بیان
حیدرآباد۔21نومبر(سیاست نیوز) ہائی ٹیکس حیدرآباد میں26تا28نومبر منعقد ہونے والی 17ویں پولٹری انڈیا ایکسپو2025کے افتتاح کے لئے انڈیا پولٹری ایکوپمنٹ مینو فیکچرز اسوسیشن ( آئی پی ای ایم اے) کے ایک اعلی سطحی وفد نے چیف منسٹر ریونت ریڈی سے ملاقات کرتے ہوئے آئی پی ای ایم اے کے ایکسپو کی تفصیلات سے واقف کروایا۔اس کے علاوہ وفد نے وزیر انیمل ہسبنڈری وی سری ہری سے بھی ملاقات کی اور انہیں بھی مدعو کیا۔آئی پی ای پی ایم کے وفد کی قیادت صدر اودئے سنگھ بیاس کررہے تھے ۔ ان کے لئے اسوسیشن کے بانی صدر پی چکردھر رائو جبکہ خازن ایم شری کانت بھی وفد میںشامل تھے۔ فیڈریشن کے ذمہ داران صدر موہن ریڈی‘ نائب صدر وی نرسمہا ریڈی‘اور نمائندہ جی کے مرلی نے چیف منسٹر سے ملاقات کرکے انہیںمجوزہ پولٹری ایکسپو2025کا افتتاح کے لئے باضابطہ دعوت نامہ بھی پیش کیا۔چیف منسٹر ریونت ریڈی سے ملاقات کے بعد ذمہ داران کا کہنا ہے کہ چیف منسٹر نے تلنگانہ کو ہندوستان میں پولٹری کی درالحکومت کے طور پرشناخت بنانے کی توجہ دلائی اور حکومت تلنگانہ کی جانب سے شعبہ پولٹری کے فروغ میں مکمل تعاون کا یقین بھی دلایا ہے۔آئی پی ای ایم اے کے ذمہ داران کا کہنا ہے کہ حکومت تلنگانہ کا مثبت ردعمل او ر پولٹری صنعت کے تئیں سنجیدہ رویہ پولٹری صنعت کے ماحولیاتی نظام کو مضبوط بنانے ‘ اختراع کی حمایت کرنے اور تلنگانہ کو بین الاقوامی اور قومی پولٹری کی صنعت کے کلیدی مرکز کے طور پر فروغ دینے کے عزم کی عکاسی کرتی ہے۔آئی پی ای ایم اے کے ذمہ داران کے مطابق 17ویں پولٹری انڈیا ایکسپو2025میں ہزاروں کی تعداد میںعالمی شرکاء ‘ مندوبین ‘ نمائش کنندگان کی شرکت متوقع ہے جہاں پر ہندوستان کی تیزی سے پھیلتی ہوئی پولٹری انڈسٹری کو تشکیل دینے والی جدید ٹکنالوجی اور رحجانات کی نمائش کی جائے گی۔