کوپل (کرناٹک): کرناٹک کے کوپل شہر کے بھاگیہ نگر میں ایک چھوٹے سے شیڈ میں رہنے والی 90 سالہ خاتون گریجما کو اس وقت اپنی زندگی کا جھٹکا لگا جب اسے ایک لاکھ روپے کا بجلی کا بل آیا۔ معمرخاتون ہر ماہ 70 سے 80 روپے بجلی کا بل ادا کرتی ہے۔ اپنی روزی روٹی کمانے کیلئے جدوجہد کر رہی گریجما آنسو بہا رہی تھی اور اس نے میڈیا سے اپیل کی کہ وہ اسے اس صورتحال سے نجات دلائیں۔ جمعرات کو میڈیا نے بجلی کے وزیر کے جے جارج سے سوال اٹھانے کے بعد انہوں نے کہا انہیں بل ملا ہے جس میں میٹر میں خرابی کی وجہ سے غلط رقم کا ذکر کیا گیا ہے۔ انہیں بل ادا کرنے کی ضرورت نہیں ہے۔ وزیرکے بیان کے بعد گلبرگہ الیکٹرسٹی سپلائی کمپنی کا عملہ ان کے شیڈ پر پہنچ گیا۔ ایگزیکٹیو انجینئر راجیش نے بجلی کے میٹر کا معائنہ کیا اور کہا کہ یہ تکنیکی خرابی تھی۔
