نئی دہلی 6 جنوری (سیاست ڈاٹ کام) مرکزی وزیر داخلہ امت شاہ نے جواہر لال نہرو یونیورسٹی تشدد معاملے میں آج لیفٹننٹ گورنر انل بیجل سے بات کی اور ان سے یونیورسٹی کے نمائندوں کے ساتھ اس معاملے پر بات چیت کرنے کے لئے کہا۔وزارت داخلہ کے مطابق اس معاملے کی جانچ دہلی پولیس کی کرائم برانچ کو سونپ دی گئی ہے ۔ وزارت داخلہ نے دلّی پولیس سے حالات اور وہاں امن و سکون بحال کرنے کیلئے کیے گئے اقدامات کے بارے میں رپورٹ مانگی ہے ۔ جے این یو رجسٹرار اور پرووائس چانسلر نے آج صبح مسٹربیجل سے ملاقات کی اور انہیں صورتحال کے بارے میں مطلع کیا۔ وزیر داخلہ امت شاہ نے اتوار کے روز دہلی پولیس کمشنر انمول پٹنائک سے بات کی تھی اور اس معاملے کی جانچ کرنے کے لئے کہا تھا۔وزیر داخلہ نے دہلی پولیس سے اس معاملے کی جانچ رپورٹ جلد از جلد سونپنے کے لئے کہا تھا۔ ایمس ٹراما سینٹر اور صفدر جنگ میں زیرعلاج 35 طلبا کا اس معاملے میں میڈیکل اور قانونی یعنی میڈیکو لیگل عمل مکمل کر لیا گیا ہے ۔جے این یو میں اتوار کو بہت سے نقاب پوش پرپسندوں نے طلبا اور اساتذہ کے ساتھ لاٹھی اور ڈنڈوں سے مارپیٹ کی جس سے جے این یو اسٹوڈنٹس یونین کی صدر آئیشی گھوش سمیت 30 افراد زخمی ہو گئے تھے ۔
