حیدرآباد۔11۔جولائی (سیاست نیوز) شادی کے استقبالیہ میں شرکت کے لئے جانے کے دوران آندھراپردیش کے ضلع پرکاشم میں پیش آئے سڑک حادثہ میں 7افرادبشمول تین خواتین، ایک کم عمر لڑکی جاں بحق ہوگئے اور دیگر 15شدید زخمی ہیں ، ان میں 4کی حالت تشویشناک ہے ۔یہ حادثہ کل شب ضلع کے دارشی کے قریب اُس وقت پیش آیا جب اے پی ایس آرٹی سی کی کرایہ پر حاصل کردہ بس کے ڈرائیور نے اس کا توازن کھودیا اور یہ بس ساگرنہر میں گرگئی۔پولیس کے مطابق حادثہ کے وقت بس میں 47افراد بشمول دو ڈرائیورس سوارتھے جو شادی کے استقبالیہ کی تقریب میں شرکت کیلئے پوڈالی سے کاکناڈاجارہے تھے ۔نہر میں پانی کی سطح میں کمی کے سبب حادثہ کی شدت زیادہ نہیں ہوئی۔زخمیوں کو فوری طورپرعلاج کے لئے قریبی سرکاری ہاسپٹل منتقل کیاگیا جبکہ شدید زخمیوں کو بہتر علاج کے لئے اونگول کے رمس ہاسپٹل لیجایاگیا۔ مہلوکین کی شناخت 65سالہ عبدالعزیز،60سالہ عبدالحئی، 48 سالہ شیخ رمیض،58سالہ ایم نورجہاں، 65سالہ ایم جانی بیگم،35سالہ شیخ شبینہ اور7سالہ حنا کے طورپر کی گئی ہے۔ پولیس نے کہا کہ اس سلسلہ میں ایک معاملہ درج کرکے جانچ شروع کردی گئی ہے۔ بس کو نہرسے نکالنے کیلئے اقدامات شروع کردیئے گئے ہیں۔حادثہ کا مقام دلخراش منظرپیش کررہاتھا۔اس حادثہ میں بس کو بھی نقصان پہنچا۔ شبہ کیاجارہا ہے کہ ڈرائیورحالت نیند میں تھا۔اسی دوران وزیراعلی جگن موہن ریڈی نے اس حادثہ پر گہرے دکھ اور افسوس کا اظہار کیا ہے ۔انہوں نے مہلوکین کے ارکان خاندان سے تعزیت کااظہارکیااور زخمیوں کے بہتر علاج کو یقینی بنانے کی حکام کو ہدایت دی۔